सूर्योदयका व्यवसायी अग्रवाल ११ लाख रुपियाँ भारतीय नोट सहित पक्राउ

इलाम: सूर्योदय नगरपालिका १० का व्यवसायी ३५ वर्षिया अनुप अग्रवाल ११ लाख रुपियाँ भारतीय नोट सहित पक्राउ परेका छन् । उनलाई हर्कटे बजारमा रहेको प्रहरी चौकीबाट खटिएको टोलीले पक्राउ गरेको हो ।

फिक्कलबाट झापा तिर जाँदै गरेको मे १ च ६४२४ कार  चेकजाँच गर्ने क्रममा अग्रवालको साथमा रहेको कालाे झाेलाबाट पाँच सयको दुई हजार एक सय ३३ थान, दुई हजारको १४ थान, दुई सयको २७ थान, एक सयको एक थान नाेट सहित ११ लाख रुपियाँ बरामद भएको प्रहरीले जानकारी दिएको छ ।

अग्रवाललाई थप अनुसन्धान र कार्वाहीको लागि आन्तरिक राजश्व अनुसन्धान कार्यालय इटहरी पठाइएको जिल्ला प्रहरी कार्यालय इलामका प्रमुख प्रहरी उपरिक्षक महेन्द्र श्रेष्ठले जानकारी दिए ।