निरा शेरचन राईको सम्झनामा २० हजार राशीको पत्रकारिता पुरस्कार स्थापना


सेवारो खबर  320 पटक हेरिएको

इलामः गणेश रसिक फाउन्डेसनको संस्थापक अध्यक्ष स्वः निरा शेरचन राईको सम्झनामा २० हजार राशीको पत्रकारिता पुरस्कार स्थापना हुँने भएको छ ।

साहित्यकार गणेश रसिकले हालै दिवङ्गत भएकी श्रीमती निरा शेरचन राईको नाम पत्रकारिता पुरस्कार स्थापना गर्ने भएको हो ।
राईको सम्झनामा शनिबार (आज) ४५ औ दिनको पुण्य तिथिको अवसरमा प्रदेश न १ का पत्रकारितामा क्रियाशील पत्रकारलाई प्रदान गर्ने पुरस्कार स्थापना गर्ने रसिकले जानकारी दिए ।

४५ औ दिनको कामको सन्दर्भमा आफ्नो जन्मथलो भोजपुरमा रहेका रसिकले दिवगत श्रीमतीको सम्झनामा सो पुरस्कार स्थापना गर्ने निणर्यमा पुगेको बताएको छ ।

‘समाजमा योगदान दिने जो कोही व्यक्तिलाई सम्मान गर्नुपर्छ’ भने धारणा जीवनको अन्तिम समयसम्म आफ्नी आमाको रहेकोले पत्रकारिता जगतबाट समाजमा योगदान पुर्‍याउने मध्येबाट एक जनालाई हरेक वर्ष पुरस्कृत गर्न सके आमाको आत्माले अझ शान्ति पाउने र समाजमा असल नियतका साथ योगदान दिने व्यक्तिमा प्रोत्साहन हुने ठानेर आफूहरू सो पुरस्कार स्थापना गर्न लागेको छोरी निरजा राई प्रधानले जानकारी दिए ।

नेपाल नाट्य तथा सङ्गीत प्रज्ञा प्रतिष्ठानका पूर्व सदस्य सचिव एव रेडियो फिक्कलका अध्यक्ष रसिकले आफ्नो जीवनकालमा श्रीमतीको समाजमा राम्रो काम गर्नेलाई सधैँ हौसला प्रदान गर्नु पर्ने बताइरहने र जीवनमा आफ्नो लागि मात्र हैन समाजको लागि पनि केही गर्नु पर्छ भन्ने सोचका साथ आफूलाई हिम्मत दिइरहने गरेको स्मरण गर्दै परिवार आफन्त शुभचिन्तक सबैको राय अनुसार पत्रकारिता पुरस्कार स्थापना गर्ने निणर्यमा पुगेको बताए । सो पुरस्कार हरेक वर्ष स्व निरा शेरचनको निधन भएको दिन प्रदान गरिने छ ।

यस वर्ष भने रेडियो फिक्कलको वार्षिक स्थापनाको दिन आगामी पौष १७ गते प्रदान गरिने भएको छ । पुरस्कार छनोट सहजीकरण र वितरण व्यवस्थापन गणेश रसिक फाउन्डेसनको समन्वयमा रेडियो फिक्कलले गर्नेछ । कोरोना सङ्क्रमण भएपछि ह्याम्स अस्पताल काठमाडौँमा उपचाररत रहेको अवस्थामा स्वर्गीय निरा शेरचनको गत कार्तिक १० गते निधन भएको थियो । पुरस्कृत हुनेको नाम आगामी पौष १२ गते सम्ममा छनोट गरिने बताइएको छ ।

तपाईको प्रतिक्रिया

सम्बन्धित समाचार