126 पटक हेरिएको 
ᤐᤌᤖᤡᤛᤏᤡᤛ᤻ᤆᤖᤣ: ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤗᤡᤶᤒᤢᤘᤠᤴ ᤁᤵᤑᤢᤖᤣᤴ ᤛᤢᤶᤛᤡᤃᤧᤰᤐᤠ ᤕᤧᤈᤢᤶᤗᤢᤱ ᤁᤣᤍᤠᤒᤠ ᤁᤰᤑᤣᤘᤠ ᥈᥏ ᤏᤢ ᥉᥆ ᤕᤧᤴᤏᤡᤳ ᤀᤥ ᤁᤣᤒᤥᤱᤒᤠ ᤐᤥᤂᤣᤀᤠᤱ ᤘᤠ ॥
ᤕᤧᤈᤢᤶᤗᤢᤱ ᤔᤥᤖᤥᤱ ᤐᤌᤖᤡᤛᤏᤡᤛ᤻ᤆᤖᤣᤒᤠ ᤛᤡᤖᤡᤈᤱᤃᤠ ᤎᤠᤷᤔᤡᤰ ᤒᤴ ᤆᤢᤶᤗᤢᤱᤜᤡᤶᤔᤧ᤹ᤀᤥ ᤐᤥᤱᤒᤠ᤹ ᤐᤥᤂᤣᤀᤠᤱ ᤘᤠ ॥
ᤐᤌᤖᤡᤛᤏᤡᤛ᤻ᤆᤖᤣᤒᤠ ᤁᤡᤕᤠᤆᤢ ᤌᤢᤶ ᤔᤥᤖᤥᤱᤒᤠ ᤆᤢᤶᤗᤢᤱᤜᤡᤶᤔᤧ᤹ᤀᤥ ᤛᤣᤴᤇᤪᤧᤱᤒᤠ ᤕᤧᤴᤒᤠ ᤆᤢᤶᤗᤢᤱᤗᤣ ᤕᤧᤈᤢᤶᤗᤢᤱ ᤕᤧᤴ ᤂᤠᤛᤧᤴᤍᤢᤒᤠ ᤖᤥ ॥
ᤁᤵᤑᤢ ᤌᤥᤛᤢᤍᤡᤶᤒᤠ ᤔᤎᤢᤖᤠᤈ ᤁᤣᤖᤢᤱᤖᤧᤴ ᤁᤢᤈᤢᤶᤗᤢᤱᤍᤠᤱᤒᤠ ᤀᤥ ᤁᤣᤒᤥᤱᤒᤠ ᤆᤢᤶᤗᤢᤱᤖᤣ ᤕᤧᤈᤢᤶᤗᤢᤱ ᤛᤒᤋ᤻ ᤆᤥᤰᤔᤠ ᤁᤢᤓᤠ ᤛᤈᤢᤶ ᤜᤢᤵᤆᤢᤶ ᤆᤥᤃᤢᤀᤠᤱ ᤘᤠ ॥
ᤒᤡᤴᤍᤪ ᤏᤠᤸᤒᤥᤖᤣᤴ ᤁᤢᤍᤱᤜᤡᤒᤠᤀᤥ ᤕᤠᤱᤈᤡᤰ ᤛᤈᤢᤶ ᤜᤢᤵᤆᤢᤶ ᤔᤣᤈᤥᤃᤢ ᤀᤠᤱ ᤘᤠ ॥ ᤛᤈᤢᤶᤀᤥ ᤍᤡᤗᤢ ᤗᤡᤱᤍᤣᤴ ᤗᤠᤘᤋᤡ, ᤁᤒᤡᤴᤍᤪ ᤛᤣᤷᤔᤠ, ᤍᤡᤗᤢ ᤛᤢᤒ᤻ᤒᤠ ᤏᤢ ᤃᤡᤋᤠ ᤂᤈᤢᤶ ᤐᤠᤛᤡᤱ ᤔᤧ᤹ᤘᤠ ॥
ᤏᤖᤣᤴᤍᤪᤖᤠᤈ ᤁᤣᤖᤢᤱᤖᤣᤴ ᤁᤢᤍᤱᤜᤡᤒᤠᤀᤥ ᤕᤥᤛᤢ ᤐᤠᤱᤔᤡ ᤏᤢ ᤀᤥᤛᤠᤒᤠ ᤛᤈᤢᤶ ᤜᤢᤵᤆᤢᤶ ᤔᤣᤈᤥᤃᤢ ॥ ॥ ᤛᤈᤢᤶᤀᤥ ᤔᤤᤛᤶ ᤔᤠᤂᤡᤶ ᤏᤢ ᤐᤪᤣᤶ ᤋᤢᤶᤒᤠᤜᤠᤱ ᤐᤠᤛᤡᤱ ᤘᤠᤛᤡ ॥
ᤍᤡᤗ ᤁᤢᤔᤠᤷ ᤗᤠᤘᤋᤡᤖᤣᤴ ᤁᤢᤍᤱᤜᤡᤒᤠᤀᤥ ᤀᤡᤱᤛᤧ ᤛᤈᤢᤶ ᤜᤢᤵᤆᤢᤶ ᤔᤣᤈᤥᤃᤢᤀᤠᤱ ᤘᤠ ॥ ᤛᤈᤢᤶᤀᤥ ᤛᤴᤍᤣᤛ ᤛᤢᤒ᤻ᤒᤠ ᤛᤣᤴᤗᤵ ᤏᤢ ᤀᤷᤈᤢᤴ ᤗᤡᤶᤒᤢ ᤐᤠᤛᤡᤱ ᤘᤠᤛᤡ ॥
ᤆᤠᤔᤠ, ᤀᤡᤶᤔᤠ ᤏᤢ ᤘᤠᤔᤠ ᤋᤱᤜᤡᤒᤠ᤹ᤀᤥ ᤔᤥᤖᤥᤱ ᤌᤢᤶ ᤆᤢᤶᤗᤢᤱᤍᤠᤱᤒᤠ ᤍᤡᤒᤡ ᤁᤢᤖᤢᤶᤒᤠᤱ, ᤑᤥ ᤆᤢᤶᤗᤢᤱᤍᤠᤱᤒᤠ ᤁᤢᤗᤒᤜᤠᤍᤢᤷ ᤜᤠᤱᤛᤪᤥᤱ ᤏᤢ ᤐᤌᤖᤡᤛᤏᤡᤛ᤻ᤆᤖᤣ ᤆᤢᤶᤗᤢᤱᤍᤠᤱᤒᤠ ᤒᤡᤁᤪᤶ ᤐᤱᤕᤠᤱᤃᤢ ᤐᤠᤛᤡᤱ ᤘᤠᤛᤡ ॥
ᤁᤣᤗᤠᤱ ᤏᤢ ᤐᤖᤡᤰ ᤐᤖᤡᤰᤐᤠ ᤛᤢᤘᤠᤱᤃᤣᤴ ᤗᤠᤶᤍᤡᤰ ᤀᤥᤛᤣᤴᤍᤱ ᤁᤣᤍᤱᤒᤠ᤹ᤀᤥ ᤀᤷᤈᤢᤴ ᤗᤡᤶᤒᤢ ᤔᤣᤛᤣᤃᤢᤀᤠᤱ ᤘᤠ ॥ ᤍᤶᤒᤷ ᤁᤢᤖᤢᤶᤒᤠᤱ ᤏᤢ ᤒᤡᤁᤪᤶ ᤐᤱᤕᤠᤱᤃᤢ ᤐᤠᤛᤡᤱ ᤔᤣᤈᤥᤛᤡ ᤀᤠᤱ ᤘᤠ ॥
ᤑᤢᤱᤘᤠᤛᤠᤵᤐᤠ ᤏᤢ ᤑᤢᤱᤘᤠᤠᤛᤠᤵᤔᤠ ᤋᤱᤜᤡᤒᤠᤀᤥ ᤈᤡᤋᤣᤴ ᤐᤴᤎᤠᤰ ᤋᤱᤜᤡᤒᤠ᤹ ᤗᤠᤱᤒᤣ ᤔᤣᤒᤡᤖᤢᤀᤠᤱ ᤘᤠ ॥ ᤁᤴ ᤛᤈᤢᤶᤀᤥ ᤔᤴ ᤁᤢᤔᤠᤖᤡ ᤐᤴᤎᤠᤰ ᤏᤢ ᤛᤴᤍᤣᤛ ᤏᤡᤱᤗᤣᤁᤢ ᤜᤠ᤹ ᤐᤠᤛᤡᤱ ᤘᤠᤛᤡ ॥
ᤂᤵᤔᤧ ᤗᤡᤛᤡ ᤗᤠᤅᤧᤴ ᤕᤠᤱ ᤆᤠᤜᤠ᤹ᤁᤣᤈᤥᤰᤐᤠ ᤕᤧᤈᤢᤶᤗᤢᤱ ᤑᤠᤛᤡᤱ ᤁᤣᤃᤧᤵᤐᤠ ᤛᤈᤢᤶᤜᤠ᤹ ᤏᤥᤃᤧᤴ ᤛᤰ ᤐ᤺ᤡᤔᤠᤛᤡ ᤂᤠᤛᤣᤴ ᤐᤥᤂᤧᤀᤠᤱ ᤘᤠ ॥
ᤁᤰᤑᤢ ᤕᤧᤈᤢᤶᤗᤢᤱ ᤋᤃᤡ ᤁᤣᤖᤣᤰ ᤌᤢᤶ ᤐᤥᤖᤠᤰ ᤕᤧᤈᤢᤶᤗᤢᤱ ᤆᤥᤰᤔᤠ ᤁᤣᤒᤥᤱᤒᤠ ᤋᤢ᤺ ᤛᤢᤜᤠᤱᤔᤡᤒᤠ ᤏᤖᤣᤴᤍᤪᤖᤠᤈ ᤁᤣᤖᤢᤱᤖᤧ ᤆᤣᤰᤂᤢ ॥ ᤀᤠᤸᤗᤥ ᤜᤠᤶᤒᤪᤡᤰ ᤐᤠᤴᤌᤷ, ᤇᤠᤐᤠ ᤏᤢ ᤛᤱᤂᤢᤘᤠᤠᤛᤓᤠ ᤀᤥ ᤌᤢ ᤕᤧᤈᤢᤶᤗᤢᤱ ᤐᤥᤂᤧ ᤆᤢᤖᤧᤀᤠᤱ ᤘᤠ ॥ ᤁᤣᤏᤶᤒᤠ ᤌᤢᤶᤜᤠ᤹ᤀᤥ ᤁᤰᤑᤧᤘᤠ ᥈᥍ ᤕᤧᤴ ᤜᤠᤶᤒᤪᤡᤰᤗᤧ ᤕᤧᤈᤢᤶᤗᤢᤱ ᤆᤥᤰᤔᤠ ᤆᤢᤵᤐᤠ ᤌᤠᤀᤡᤱ ᤋᤢ᤺ ᤛᤢᤜᤠᤱᤔᤡᤒᤠ ᤁᤣᤖᤢᤱᤖᤧ ᤆᤥᤃᤢ ॥
