154 पटक हेरिएको 
ᤀᤡᤔᤠᤶ: ᤗᤠᤈᤣ ᤁᤢᤍᤡᤶ ᤛᤧᤰᤛᤡᤱ ᤘᤠ᤺ᤏᤠᤶ ᤐᤥᤴᤍᤣᤀᤠᤱ ᤘᤠ᤺ ॥ ᤐᤠ᤺ᤱᤓᤣ ᤐᤠ᤺ᤱᤕᤰᤐᤠ ᤜᤡᤶᤜᤡᤶᤔᤧᤀᤥ ᤕᤥᤛᤢᤐᤠᤱᤔᤡ ᤐᤥᤱᤔᤠ᤺ ᤌᤰᤛᤢᤘᤠᤒᤠ᤺ ᤓᤥᤋ᤻ ᤏᤠᤰᤏᤢ ᤔᤧᤘᤠ᤺ ॥
ᤌᤰᤛᤢᤘᤠᤒᤠ᤺ᤜᤠ᤹ ᤀᤠᤒᤠᤅᤣ ᤀᤡᤱᤓᤥᤴᤛ᤺ᤰ ᤀᤡᤛᤡᤰ ᤛᤠᤵᤛᤧᤰᤛᤠᤒᤠ᤺ᤜᤠᤖᤣᤴ ᤏᤡᤱᤘᤠᤐᤠ᤺ᤴ ᤛᤢᤶᤏᤢ ᤔᤣᤕᤠᤰ ॥
ᤕᤢᤰᤑᤥᤖᤣ ᤁᤣᤍᤠᤒᤠ ᤛᤠ᤺ᤰᤑᤧᤰᤘᤠ ᥈᥇ ᤕᤧᤴᤏᤡᤳ ᤀᤥ ᤕᤧᤓᤠᤱᤗᤢᤱᤗᤧᤴ ᤛᤧᤰᤛᤡᤱ ᤕᤧᤴ ᤛᤣᤃᤢᤀᤠᤱ ᤜᤠᤱᤌᤡᤶ ᤗᤠᤶᤗᤥᤒᤠᤜᤠ ᤏᤢᤖᤡᤰᤁᤠᤱ ᤀᤡᤶᤔᤠ ᤔᤣᤱᤄᤥᤀᤧ ᤔᤣᤘᤠᤒᤠ ᤔᤣᤒᤠᤋᤢ ॥
ᤁᤴ ᤐᤖᤢᤵᤀᤥ ᤕᤠᤰᤌᤢᤱ ᤏᤡᤛᤢᤶ ᤔᤡᤱᤛᤥ ᤕᤢᤰᤛᤡᤱ ᤁᤣᤈᤥᤰᤐᤠ ᤗᤠᤶᤗᤥᤒᤠ᤺ᤜᤠ ᤔᤣᤜᤥᤵ ॥ ᤓᤥᤋ᤻ ᤏᤠᤰᤏᤢ ᤁᤧᤍᤠᤒᤠ ᤌᤰᤛᤢᤘᤠᤒᤠ᤺ ᤕᤠ᤹ ᤜᤠᤱᤌᤡᤶ ᤐᤖᤢᤰᤖᤣᤴ ᤀᤡᤱᤓᤥᤴᤛ᤺ᤰᤀᤥ ᤏᤡᤛᤢᤶ ᤔᤡᤱᤛᤥᤖᤣᤴ ᤐᤠ᤺ᤴᤏᤧ ᤜᤥᤵ ॥
ᤏᤡᤛᤢᤶ ᤔᤡᤱᤛᤥ ᤕᤢᤰᤛᤡᤱᤖᤣᤴ ᤜᤠᤱᤌᤡᤶ ᤔᤕᤣᤀᤠᤱᤘᤠ ॥ ᤗᤠᤶᤗᤥᤒᤠᤜᤠ᤺ ᤀᤠᤒᤠᤅᤣ ᤀᤠᤒᤠᤅᤣ ᤘᤧᤱᤈᤠᤱᤀᤥ ᤔᤧᤏᤡᤒᤣ ᤀᤠᤱ ᤔᤧᤕᤠᤰ ॥ ᤀᤠᤒᤠᤅᤣ ᤀᤠᤒᤠᤅᤣ ᤜᤠᤱᤌᤡᤶ ᤐᤖᤢᤵᤀᤥ ᤔᤣᤛᤣᤴᤍᤧᤀᤠᤱ ᤔᤧᤘᤠ ॥
ᤕᤠᤰᤌᤢᤱ ᤐᤠᤴᤍᤠᤱᤏᤢ ᤗᤳᤌᤡᤰ ᤔᤢᤰᤐᤠ᤺ᤴ ᤘᤠ᤹ ᤑᤰᤋᤠᤱ ᤋᤅᤡᤸᤗᤣ ᤛ᤺ᤡᤱ ᤐᤠᤱᤛᤡᤱ ॥ ᤌᤢᤶᤒᤥ ᤋᤅᤡᤸᤗᤣ ᤘᤠ᤺ᤓᤥᤰᤛᤡᤱ ॥ ᤁᤖ ᤕᤠᤰᤌᤢᤱ ᤏᤡᤛᤢᤶ ᤔᤡᤱᤛᤥ ᤕᤢᤰᤛᤡᤱ ᤆᤥᤰᤔᤠ᤺ ᤜᤠᤱᤌᤡᤶ ᤗᤠᤶ ᤁᤣᤗᤥᤒᤠᤜᤠ ᤁᤴ ᤔᤢᤰᤐᤠ᤺ᤴᤏᤡᤸᤗᤣ ᤔᤧᤛᤢᤙ᤻ᤛᤡᤴ ॥
ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤏᤢ ᤕᤠᤰᤌᤢᤱ ᤛᤢᤘᤠᤱᤛᤠᤒᤠ ᤐᤖᤢᤵᤐᤡᤸᤗᤧ ᤏᤡᤛᤢᤶ ᤔᤡᤱᤛᤥ ᤕᤢᤰᤛᤡᤱ ᤁᤧᤈᤥᤰᤐᤠ᤺ ᤏᤢ ᤔᤢᤰᤁᤢᤰᤗᤢᤱ ᤀᤥ ᤁᤣᤒᤢᤗᤁᤠᤖ ᤂᤣᤖᤥᤳᤋᤡ ᤁᤣᤈᤥᤰᤐᤠ᤺ ᤕᤥᤛᤢᤐᤠᤱᤔᤡᤜᤠᤖᤰ ᤓᤥᤋ᤻ ᤐᤡᤔᤠ᤺ ᤀᤐᤡᤗ ᤆᤥᤃᤢᤀᤠᤱ ᤘᤠ ॥ ᤆᤢᤶᤗᤢᤅᤡᤸᤗᤣᤴ ᤁᤴ ᤀᤐᤡᤗᤧᤴ ᤛᤧᤰᤛᤠᤵ ᤀᤥ ᤏᤡᤔᤠ᤺ ᤃ᤺ ᤛᤠ᤺ᤰᤑᤧᤰᤘᤠ ᥈᥇ ᤕᤧᤴᤏᤡᤳ ᤀᤣᤃᤠᤱ ᤗᤰ ᤂᤥᤍᤧᤳ ॥
ᤏᤡᤛᤢᤶ ᤔᤡᤱᤛᤥ ᤕᤢᤰᤛᤡᤱᤖᤣᤴ ᤏᤣᤳᤒᤥᤱ ᤋᤱᤒᤣ ᤋᤃᤡᤀᤠᤱ ᤁᤏᤠᤒᤠ ᤋᤢᤴᤍᤧᤴ ᤗᤠᤶ ᤁᤒᤥᤵᤐᤠ᤺ ᤛᤥᤄᤠ᤺ ᤀᤡᤛᤡᤰᤐᤠ᤺ ᤐᤥᤂᤣ ᤗᤖᤡᤰ ᤆᤧᤱᤔᤠ᤺ ᤔᤧᤜᤣᤰᤋᤢ ᤀᤠᤱᤘᤠ ॥
ᤁᤴᤒᤠᤈᤢᤖᤰ ᤔᤧᤴ ᤏᤡᤛᤢᤶ ᤔᤡᤱᤛᤥ ᤕᤢᤰᤛᤡᤱ ᤋᤢᤴᤍᤧᤖᤣᤴ ᤌᤰᤛᤠᤱ ᤀᤥ ᤌᤡᤰᤜᤢᤵ ᤁᤣᤒᤥᤱᤒᤠ ᤜᤠᤱᤌᤡᤶ ᤐᤖᤢᤰ ᤏᤢ ᤔᤢᤰᤛᤠᤶ ᤜᤠ᤹ ᤛᤧᤰᤛᤡᤱ ᤋᤠᤀᤡᤸᤗᤣ ᤏᤠ ᤏᤢ ᤁᤏᤠ ᤔᤣᤒᤥᤱ ॥ ᤀᤠᤒᤠᤅᤣ ᤀᤠᤒᤠᤅᤣ ᤏᤡᤱᤗᤧᤶᤔᤠ᤺ ᤕᤠᤶᤒᤁᤡᤸᤗᤣ ᤏᤡᤛᤢᤶ ᤔᤡᤱᤛᤥ ᤋᤢᤴᤍᤣᤴ ᤀᤡᤵᤛᤡᤱᤗ ᤕᤠᤰ ॥
ᤏᤡᤛᤢᤶ ᤋᤢᤴᤍᤧᤴᤖᤣᤴ ᤗᤠᤰᤗᤥᤒᤠᤜᤠ᤹ ᤕᤶᤒᤠ ᤜᤠᤱᤌᤡᤶ ᤐᤖᤢᤵ ᤀᤥ ᤁᤠᤶᤛᤡᤱᤔᤠ᤺ ᤏᤢ ᤁᤢᤓᤠ ᤜᤧᤰᤕᤠᤶᤛᤠᤒᤠᤜᤠ᤺ ᤀᤠᤒᤠᤅᤣ ᤜᤠᤱᤌᤡᤶ ᤐᤖᤢᤵ ᤆᤥᤰᤏᤢ ᤋᤃᤡ ᤔᤣᤒᤥᤛᤠᤱ ᤛᤠᤵᤛᤧᤰᤀᤥ ᤏᤡᤔᤣᤴᤍᤧᤳᤏᤣᤴᤏᤡᤸᤗᤣ ᤔᤧᤴᤇᤠᤶᤛᤠᤜᤠᤖᤣᤴ ᤏᤡᤱᤘᤠ ᤔᤠ᤺ᤔᤠ ᤜᤣᤰᤋᤣᤀᤠᤱ ᤘᤠ ॥ ᤁᤴ ᤀᤡᤎᤠᤀᤡᤴ ᤐᤥᤖᤣᤖ ᤌᤠᤅᤣᤸᤗᤣ ᤁᤴ ᤛᤧᤰᤛᤡᤱ ᤀᤥ ᤀᤠᤱ ᤕᤶᤒᤠ ᤌᤢᤶᤄᤥ ᤏᤡᤱᤛᤠᤱ ᤆᤥᤰᤔᤠ ᤔᤣᤍᤧᤳᤏᤣᤴᤒᤠ᤺ ᤆᤡᤈᤧᤵ ᤆᤥᤰᤔᤠ᤺ ᤔᤧᤜᤣᤰᤋᤢ ᤀᤠᤱᤘᤠ ॥
ᤀᤢᤴᤇᤥᤴᤒᤠ ᤜᤠᤱᤌᤡᤶ ᤐᤖᤢᤵᤜᤠ ᤖᤧ ᤏᤡᤛᤢᤶ ᤔᤡᤱᤛᤥ ᤐᤥᤔᤣᤴᤎᤰᤋᤢᤴ ॥ ᤙᤪᤶ ᤛᤙ᤻ᤁᤪᤡᤋᤡ ᤐᤠᤷᤋᤡ, ᤀᤢᤈ᤻ᤕᤠᤗᤥ ᤏᤣᤐᤠᤸ ᤏᤢ ᤖᤠᤛ᤻ᤋᤪᤡᤕ ᤐᤖᤡᤘᤷᤋᤴ ᤁᤢᤛᤱ ᤜᤠᤱᤌᤡᤶ ᤐᤖᤢᤵ ᤛᤠ᤺ᤔᤧᤘᤠᤴᤍᤣ ॥
ᤙᤪᤶ ᤛᤙ᤻ᤁᤪᤡᤋᤡ ᤐᤠᤷᤋᤡᤸᤗᤣ ᤏᤡᤛᤢᤶ ᤔᤡᤱᤛᤥᤴ ᤐᤥᤎᤰᤔᤠ᤺ ᤔᤧᤴᤇᤢᤰᤁᤣ ᤘᤠ ॥ ᤀᤢᤈ᤻ᤕᤠᤗᤥ ᤏᤣᤐᤠᤸ ᤏᤢ ᤖᤠᤛ᤻ᤋᤪᤡᤕ ᤐᤖᤡᤘᤷᤋᤴ ᤏᤢ ᤛᤱᤄᤡᤕ ᤗᤥᤰᤋᤠᤴᤋᤪᤡᤰ ᤐᤠᤷᤋᤪᤡ ᤏᤡᤛᤢᤶ ᤔᤡᤱᤛᤥᤸᤗᤧᤴ ᤋᤢᤴᤍᤧᤴ ᤔᤧᤓᤥᤂᤢᤛᤠᤱ ᤛᤧᤰᤛᤠᤒᤠ᤺ ᤔᤣᤃᤳᤋᤢᤴ ॥
ᤛᤧᤰᤛᤡᤱ ᤆᤢᤶᤓᤥᤎᤰ ᤖᤣ ᤛᤧᤰᤛᤡᤱᤖᤣᤴ ᤁᤣᤖᤣᤰ ᤕᤠᤶᤒᤰ ᤕᤠᤖᤡᤵ ᤆᤥᤃᤢᤷ ᤕᤠ᤺ᤰ ॥
ᤌᤢᤶ ᤛᤧᤰᤛᤡᤱ ᤆᤢᤶᤓᤥᤎᤰ ᤖᤣ ᤛᤧᤰᤛᤡᤱ ᤕᤧᤴ ᤀᤥ ᤆᤠᤜᤠ᤹᤺ ᤁᤣᤈᤥᤰᤐᤠ᤺ ᤆᤡᤃᤰᤘᤠ᤺ᤜᤠ ᤛᤠᤵᤛᤧᤰ ᤗᤰᤔᤠ᤺ ᤋᤣᤴᤀᤥ ᤜᤠ᤺ᤱᤔᤠ ᤁ᤺ᤰ ᤆᤥᤃᤢᤷ ᤕᤠᤰᤐᤠ᤺ ᤌᤠᤀᤡᤱ ᤆᤥᤃᤢᤀᤠᤱ ᤘᤠ᤺ ॥
ᤋᤢᤶ ᤌᤢᤶ ᤕᤢᤰᤐᤠᤜᤠ᤺ᤖᤣ ᤛᤧᤰᤛᤡᤱ ᤕᤧᤴ ᤋᤠᤱᤛᤧᤵᤖᤣᤴ ᤕᤠᤶᤒᤰ ᤆᤢᤖᤣᤒᤠ ᤌᤠᤠᤀᤡᤱ ᤔᤣ᤺ᤈᤥᤃᤢ ᤀᤠᤱ ᤘᤠ ॥ ᤛᤧᤰᤛᤡᤱ ᤕᤧᤴ ᤁᤠᤶᤔᤪᤠᤱ ᤔᤣᤳᤇᤣ ᤏᤣᤐᤠᤸ ᤐᤪᤜᤖᤡ, ᤏᤣᤐᤠᤸ ᤛᤛ᤻ᤋᤪ ᤐᤪᤜᤖᤡ ᤏᤢ ᤏᤣᤐᤠᤗᤡ ᤛᤣᤏᤠᤜᤠ᤹ᤖᤣ ᤕᤠᤶᤒᤰ ᤆᤥᤰᤔᤠ᤺ ᤔᤣᤜᤣᤰᤋᤢ ᤀᤠᤱ ᤘᤠ᤺ ॥
