168 पटक हेरिएको 
ᤀᤡᤗᤠᤶ: ᤔᤢᤰᤁᤢᤶᤗᤢᤱ ᤜᤡᤴᤎᤥᤰᤗᤧᤴ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤱᤗᤣ ᤗᤠᤶᤛᤣᤴᤔᤠ᤹᤺ᤀᤣ ᤗᤡᤔᤠ᤹᤺ᤀᤠᤱ ᤛᤱᤈᤢᤶᤋᤥᤴ ᤆᤥᤰᤔᤠ ᤕᤠᤰᤐᤠᤱᤃᤣᤴ ᤏᤢ ᤁᤵᤕᤠᤰᤐᤠᤱᤃᤣᤒᤠ ᤔᤣᤴᤇᤠᤶ ᤗᤠᤄᤥᤠᤛᤠᤒᤠᤜᤠ᤹ᤏᤢ ᤐᤣ᤺ᤗᤡ ᤆᤥᤃᤢᤀᤠᤱ ᤘᤠ ॥
ᤆᤢᤶᤗᤱᤅᤡᤸᤗᤣ ᤋᤧᤏᤣᤒᤠ ᤕᤧᤴ ᤀᤡᤱᤛᤰᤋᤥᤴ ᤗᤠ᤺ᤶ ᤔᤢᤰᤁᤢᤶᤗᤢᤱ ᤋᤣᤴᤀᤥ ᤂᤠᤶᤄᤢᤗᤠᤶ ᤁᤣᤒᤥᤱᤒᤠᤖ ᤁᤣᤕᤠᤰᤐᤠ᤺ ᤕᤠᤵᤔᤡ ᤕᤱᤔᤠ᤹ᤛᤣᤵᤔᤠ ᤕᤠᤶᤒᤰ ᤆᤥᤰᤔᤠ ᤗᤣᤵᤔᤠ ᤁᤣᤒᤥᤱᤒᤠ᤺ ᤏᤠᤰ ᤕᤢᤰᤂᤢ ᤀᤠᤱ ᤘᤠ ॥ ᤂᤣᤀᤥ ᤏᤢ ᤛᤛ᤻ᤋᤪ ᤋᤡᤗᤡᤱᤃᤠᤜᤠ᤹ ᤏᤢᤰᤔᤠᤛᤡᤀᤠᤱ ᤁᤣᤒᤗᤁᤠᤖ ᤆᤥᤰᤔᤠ ᤕᤶᤒᤰ ᤆᤥᤰᤀᤠᤱ ᤗᤧᤵᤔᤠ ᤆᤰᤏᤠᤰ ᤋᤥᤴᤍᤢ ᤀᤠᤱ ᤘᤠ ॥
‘ᤔᤢᤰᤁᤢᤶᤗᤢᤱ᤹ᤋᤧ᤺ᤴ ᤀᤥ ᤛᤛ᤻ᤋᤪ ᤋᤡᤗᤡᤱᤃᤠᤜᤠ᤹ ᤗᤠᤶ ᤋᤣᤴᤇᤠᤒᤠ᤹ ᤑᤵᤔᤠ ᤕᤠᤶᤒᤰᤁᤡᤸᤗᤧ ᤐᤠᤴᤍᤠᤀᤥ ᤆᤥᤰᤕᤢᤶᤒᤠ ᤏᤢ ᤗᤠᤶᤛᤣᤴᤔᤠ᤹᤺ᤀᤣᤒᤠ ᤂᤠ᤺ᤛᤣᤴ ᤁᤣᤈᤥᤰᤐᤠ ᤛᤈᤢᤶ ᤜᤢᤵᤆᤢᤶ ᤆᤥᤰᤔᤠ ᤐᤥᤱ ॥ ᤋᤡᤗᤡᤱᤃᤠ᤹᤺ᤜᤠᤖᤣ ᤔᤧᤈᤥᤃᤢᤒᤠ ᤜ᤺ᤡᤏᤠᤶᤒᤠ ᤕᤠᤶᤒᤰᤁᤡᤴ ᤏᤠᤳᤗᤡᤱ ᤆᤥᤰᤔᤠ᤹ᤀᤠᤱ ᤂᤠᤶᤄᤢᤖᤣ ᤑᤧᤴᤍᤢᤒᤠ᤺ ᤔᤣᤴᤇᤠᤶᤗᤠᤄᤥ ᤗᤠᤶᤔᤡᤸᤗᤧ ᤐᤠᤴᤍᤠ᤹ᤀᤥ ᤁᤢᤈᤠ᤹ᤐᤠ᤺ᤴ ᤛᤱᤈᤢᤶᤋᤥᤴ ᤆᤥᤰᤔᤠ᤺ ᤕᤠᤰᤐᤠᤱᤃᤣᤴ ᤏᤢ ᤁᤵᤕᤠᤰᤐᤠᤱᤃᤣᤒᤠ ᤔᤣᤴᤇᤠᤶ ᤗᤠᤄᤥᤠᤒᤠ᤺ ᤆᤢᤶᤓᤥ᤹ᤜᤠ᤺ᤏᤢ ᤗᤢᤱᤔᤣᤴᤍᤡᤱ ᤐᤣᤗᤡ ᤘᤠ᤹ ᤆᤢᤶᤗᤢᤱᤗᤣᤴ ᤔᤠ᤺ᤛᤢᤜᤠᤱᤔᤡᤔᤠ᤺ ᤏᤡᤖᤴᤋᤡ ᤋᤢᤶᤒᤠᤐᤥ᤹ᤖᤣ ᤜᤢᤰᤛᤠᤵ ᤌᤣᤈᤡ ᤆᤥᤃᤢᤒᤠ ᤀᤡᤱᤛᤰᤋᤥᤴ ᤀᤥ ᤐᤥᤎᤰᤋᤢ ᤀᤠᤱ ᤐᤳ ॥
ᤀᤡᤱᤛᤰᤋᤥᤴ ᤗᤠᤶ ᤋᤡᤗᤡᤱᤃᤠᤜᤠ᤹᤺ᤖᤣᤴ ᤁᤥᤖᤠᤰᤖᤣ ᤕᤠᤱᤂᤢ᤹ᤛᤡᤀᤠᤱ ᤛᤃᤢᤴ ᤗᤠᤘᤋᤡᤏ ᤁᤢᤛᤱᤒᤣᤀᤥ᤹ ᤕᤠᤶ ᤗᤡᤶᤒᤢᤖᤣᤴ ᤗᤠᤱᤛᤡ ᤏᤢ ᤔᤷᤎᤴ ᤐᤠᤗᤢᤱᤘᤠᤗᤧᤴ ᤆᤢᤵᤛᤠᤱᤔᤠ ᤗᤠᤵᤑᤡᤱᤀᤥ ᤏᤢ ᤔᤱᤃᤗ ᤗᤠᤘᤋᤡᤗᤧᤴ ᤁᤢᤎᤣᤰᤐᤠ ᤀᤥ ᤁᤠᤴᤍᤣᤀᤠᤱ ᤘᤠ᤹ ᤜᤢᤴᤇᤡᤖᤣᤴ ᤘᤠᤏᤠᤶ ᤏᤢ᤹ᤒᤠ ᤜᤥᤵ ॥ ᤒᤠ ᤀᤰᤂᤣᤗᤖᤡᤰ ᤒᤠᤄᤴ ᤜᤡᤴᤎᤥᤰᤂᤣ᤹ᤀᤥ ᤍᤡᤐᤣᤛ ᤔᤠᤍᤣᤴᤛᤥᤖᤡᤰ ᥋᥋ ᤕᤠᤵᤔᤡᤜᤠ᤹᤺ ᤔᤣᤃᤠᤴᤍᤣᤀᤠᤱ ᤔᤣᤘᤠ ॥ ᤜᤢᤴᤇᤡᤖᤣᤴ ᤕᤠᤶᤈᤡᤰ ᤏᤢ᤹ᤒᤠ ᤐᤥᤱᤗ ᤁᤣᤖᤒᤠ ᤏᤥ᤹ᤀᤡᤳᤇᤥ ᤘᤠ ॥ ᤋᤡᤗᤡᤱᤃᤠ᤹ᤜᤠ᤺ᤖᤣ ᤔᤣᤍᤣᤶᤛᤢ᤹ᤛᤡᤒᤠ ᤆᤴᤍᤪ ᤛᤠᤃᤖ ᤗᤡᤶᤒᤢ᤹ ᤗᤇ᤻ᤔᤴ ᤗᤡᤶᤒᤢ᤹ᤜᤠ᤺ ᤌᤣᤀᤠᤱ ᤗᤠᤶᤎᤣᤰᤔᤠᤀᤣ ᤗᤣᤵ ᤗᤣᤵᤔᤠᤛᤡ ᤏᤠᤰᤐᤧ᤺ᤗᤡ ᤔᤧᤕᤢᤰᤂᤢ ᤀᤠᤱ ᤘᤠ ॥
ᤁᤰᤑᤧᤘᤠ᤺ ᥇᥈ ᤕᤣᤴ ᤔᤢᤴᤎᤢᤶᤗᤣ ᤐᤥᤎᤰᤋᤢ᤹ᤒᤠ ᤔᤢᤰᤁᤢᤶᤗᤢᤱ ᤋᤣᤴᤀᤥ ᤁᤣᤒᤗᤁᤠᤖ ᤆᤥᤰᤔᤠ ᤕᤠᤶᤒᤰᤁᤡᤴ ᤛᤏᤠᤖᤢᤱᤗᤠᤶ ᤀ᤺ᤳᤔᤠ ᤕᤠᤶᤒᤰᤀᤥ ᤒᤗᤢᤍᤠᤍᤠ᤹ᤀᤥ ᤁᤣᤃᤧᤵᤐᤠ ᤔᤢᤰᤁᤢᤶᤗᤢᤱ ᤋᤠᤱᤛᤣᤵᤛᤠᤒᤠ ᤕᤠᤵᤔᤡᤜᤠ᤹ ᤛᤛᤋᤪ ᤏᤢ ᤈᤏᤐᤌ ᤋᤡᤗᤡᤱᤃᤠ᤹ᤖᤣᤶ ᤕᤶᤒᤠ ᤐᤖᤢᤵᤗᤧᤶ ᤋᤢᤖᤠ᤹᤺ᤜᤠ ᤔᤣᤒᤣᤀᤠᤱ ᤋᤰ ᤆᤠᤀᤡ ᤔᤧᤕᤠᤃᤣᤒᤠ ᤕᤧᤶᤀᤥ ᤀᤛᤢᤪ ᤃᤠᤩᤛ ᤔᤣᤍᤖᤢᤛᤡᤀᤠᤱ ᤔᤣᤄᤣᤳᤇᤡᤅᤣᤖ ᤔᤣᤗᤥᤰᤋᤧᤸᤗᤣᤒᤠ ᤕᤧᤶᤀᤥ ᤔᤧᤛᤥᤰᤋᤢᤛᤡᤖ ᤁᤥᤖᤠᤰᤗᤧ ᤔᤧᤍᤖᤢᤛᤡᤀᤠᤱ ᤁᤧᤃᤠᤶᤒᤠ ᤔᤧᤴᤇᤢᤰᤏᤠᤒᤠ᤹ᤜᤠ᤺ ᤐᤖᤢᤵ ᤔᤧᤈᤥᤃᤢᤛᤡᤀᤠᤱ ᤗᤠᤱᤛᤢᤵ (ᤒᤢᤋ) ᤏᤢ ᤋᤡᤶᤔᤰᤁᤡᤸᤗᤧ᤹ ᤁᤢᤗᤠᤅᤡᤸᤗᤧ ᤕᤛᤠ᤹᤺ ᤌᤧᤳᤋᤢᤛᤡᤖ ᤜᤡᤵᤔᤠᤛᤡ ᤕᤠᤵᤔᤡ ᤔᤧᤶᤒᤠ᤹ ᤜᤣᤰᤁᤣᤒᤠ ᤕᤠᤶᤒᤰᤁᤡᤴ ᤜᤡ᤺ᤏᤠᤶ ᤏᤢ ᤋᤠᤑᤣᤶᤒᤠ ᤐᤥᤂᤣᤒᤠ ᤔᤣᤒᤠᤋᤢᤀᤠᤱ ᤘᤠ ॥
ᤏᤣᤐᤠᤸᤒᤠ ᤁᤢᤓᤠᤱ ᤛᤶᤒᤡᤎᤠᤴ ᥆᥍᥈ ᤖᤣᤴ ᤎᤠᤖᤠ ᥈᥌ ᤏᤢ ᤎᤠᤖᤠ ᥉᥈ ᤀᤡᤛᤡᤰ ᤛᤱᤈᤢᤶᤔᤡᤒᤠ ᤛᤠᤶᤕᤥᤋᤧᤴ, ᤛᤠᤶᤈᤡᤰᤋᤧᤴ ᤏᤢ ᤛᤠᤶᤕᤥᤍᤡᤶᤒᤠ (ᤀᤠᤎ᤻ᤕᤠᤳᤔᤡᤰ) ᤋᤧᤴᤗᤧᤴ ᤋᤣᤴᤇᤠᤒᤠ᤹ᤜᤠ᤺ᤖᤣ ᤋᤠᤱᤛᤧᤵ ᤆᤥᤰᤔᤠ ᤂᤥᤁᤣᤍᤧᤵᤐᤠ ᤕᤢᤰᤗᤠᤄᤥ ᤀᤡᤛᤡᤰ ᤔᤢᤰᤁᤢᤶᤗᤢᤱ ᤋᤧᤴᤗᤧᤴ ᤋᤠᤱᤛᤧᤵ ᤆᤥᤃᤢᤶᤒᤠᤩᤀᤠᤱ ᤅᤣ᤹ᤗᤧᤖᤢᤶᤒᤠᤩ ᤁᤧᤖᤒᤠ ᤆᤥᤰᤏᤡᤜᤢᤶ ᤘᤠ᤹ᤒᤠ ᤐᤥᤎᤰ ᤔᤣᤈᤥᤃᤢ ᤀᤠᤱ ᤘᤠ ॥
