᥉᥇ᤋᤱᤒᤣᤒᤠ᤺ ᤒᤡᤛ᤻ᤘ ᤀᤠᤍᤡᤘᤠᤛᤡ ᤒᤡᤘᤛᤖᤧ ᤁᤢᤔᤡᤱᤀᤥ ᤀᤴᤍᤪᤡᤵ ᤏᤢ ᤀᤠᤀᤡᤀᤣᤗ᤹ᤀᤥ ᥇᥌᥏ ᤐᤠ᤺ᤴᤍᤠᤀᤥ ᤐᤠ᤺ᤴᤌᤱ ᤐᤥᤰᤂᤣ

ᤀᤡᤗᤠᤶ : ᥉᥇ ᤋᤱᤒᤣᤒᤠ᤺ ᤒᤡᤛ᤻ᤘ ᤀᤠᤍᤡᤘᤠᤛᤡ ᤒᤡᤘᤛ ᤛᤣᤴᤇᤧᤳᤱᤒᤠ ᤕᤧᤴ ᤀᤠᤍᤡᤘᤠᤛᤡ ᤈᤏᤈᤠᤋᤡ ᤔᤜᤠᤛᤅ ᤌᤢᤶ ᤕᤰᤆᤢᤶᤖᤣ ᤀᤡᤗᤠᤶ ᤐᤠ᤺ᤱᤈᤢᤶᤠᤀᤥ ᤐᤠ᤺ᤴᤌᤱᤔᤠ ᤋᤱᤃᤠᤶ ᤆᤥᤃᤢᤀᤠᤱ ᤘᤠ ॥

ᤕᤠᤱᤏᤡᤶᤓᤢᤱ ᤆᤢᤘᤠᤳ ᤂᤠᤶᤒᤣᤰ ᤏᤢ ᤋᤠ᤺ᤶᤓᤢᤱᤀᤥ ᤂᤠ᤺ᤶᤒᤥᤱᤘᤠ ᤛᤢᤘᤠᤱᤖᤣᤴ ᤕᤢᤰ ᤗᤠ᤺ᤄᤥᤖᤣᤶ ᤏᤡᤴᤎᤥ ᤆᤥᤃ᤺ᤣ ॥ ᤀᤴᤍᤪᤡᤵ ᤏᤢ ᤀᤠᤀᤡᤀᤣᤗᤀᤥ ᥇᥌᥏ ᤖᤧᤴ ᤐᤠ᤺ᤴᤍᤠᤀᤥ ᤛᤠᤱᤓᤠᤱᤗᤢᤱᤖᤧ ᤀᤥᤴᤎᤠᤰ ᤆᤥᤃᤢᤒᤠ ᤀᤡᤛᤡᤰ ᤕᤠᤶᤒᤰ ᤆᤥᤃᤣ ॥ ᤁᤣᤖᤒᤠ᤺ ᤐᤠ᤺ᤴᤍᤠᤀᤥ ᤐᤠ᤺ᤴᤌᤱ ᤋᤱᤃᤠᤶ ᤆᤥᤃᤢᤒᤠ᤺ ᤔᤜᤠᤛᤱᤖᤣ ᤌᤠᤀᤡᤱ ᤆᤥᤃᤢ ᤘᤠ ॥

ᤛᤠᤱᤓᤠᤱᤗᤢᤱᤖᤧ ᤀᤥᤴᤎᤠᤰ ᤆᤥᤃᤢᤒᤠ ᤀᤡᤛᤡᤰ ᤜᤠᤱᤈᤢᤶᤸᤗᤣ ᤁᤢᤃᤥ ᤁᤢᤓᤠᤱ ᤆᤥᤃᤢᤸᤗᤣ ᤀᤴᤍᤪᤡᤵ ᤏᤢ ᤀᤠᤀᤡᤀᤣᤗ᤹ᤀᤥ ᥇᥌᥏ ᤀᤥᤒᤠ᤺ ᤂᤠᤶᤒᤥᤱᤘᤠᤖᤣᤴ ᤐᤠ᤺ᤴᤍᤠᤀᤥ ᤐᤠ᤺ᤋᤢᤒᤠ ᤀᤡᤛᤡᤰ ᤕᤠᤶᤒᤰ ᤆᤥᤰᤐᤠᤱᤔᤠ᤺ ᤐᤠ᤺ᤴᤌᤱ ᤋᤱᤃᤠᤶ ᤔᤣᤆᤥᤃᤢᤒᤠ᤺ ᤔᤜᤠᤛᤱ ᤕᤰᤆᤢᤶ ᤌᤥᤛᤢᤍᤡᤶᤒᤠ᤺ ᤀᤓᤡᤛᤣᤰ ᤕᤧᤰᤋᤣᤴᤖᤣ ᤌᤠᤀᤡᤱ ᤆᤥᤃᤢ ॥

ᤀᤴᤋᤖᤠᤛ᤻ᤋᤡᤕ ᤛᤪᤶ ᤛᤱᤃᤌᤴ ᥇᥌᥏ ᤏᤢ ᤂᤠᤶᤒᤥᤱᤘᤠ ᤛᤢᤘᤠᤱᤜᤠ᤹ᤖᤣᤴ ᤕᤢ᤺ᤰ ᤗᤠ᤺ᤄᤥᤒᤠ ᤛᤱᤕᤢᤰᤋ ᤖᤠᤛ᤻ᤋᤛᤱᤄᤡᤕ ᤀᤡᤱᤓᤥᤴ ᤛᤰ ᥈᥆᥆᥍ ᤀᤥᤃᤠᤵ ᤋᤣᤴᤍᤡᤱ ᤁᤣᤈᤥᤰᤐᤠ᤺ ᤗᤠᤈᤣ ᤐᤥᤂᤣᤒᤠ ᤕᤸᤗᤡᤰ ᤋᤱᤒᤣ ᤐᤥᤂᤣᤛᤠᤱ ᤜᤧ᤺ᤴ ᤀᤡᤛᤡᤰ ᤕᤠᤶᤒᤰ ᤔᤣᤈᤥᤃᤢᤴᤏᤠᤱ ᤕᤢᤰᤑᤥᤖᤣ ᤁᤢᤔᤡᤱᤀᤥ ᤖᤡᤋ᤻ ᤋᤢᤴᤍᤣ ᤕᤠᤰᤔᤠ᤺ ᤐᤥᤂᤣᤒᤠ ᤏᤣᤐᤠᤸᤁᤠ ᤀᤠᤍᤡᤒᤠᤛᤡᤜᤖᤢᤁᤥ ᤔᤠᤏᤒ ᤀᤎᤡᤁᤠᤷ ᤛᤶᤒᤴᤎᤡ ᤘᤁᤡᤗ ᤛᤔᤢᤜ (ᤗᤠ᤺ᤜᤢᤷᤏᤡᤵ) ᤗᤠᤶᤒᤠ᤺ ᤖᤡᤋ᤻ ᤋᤢᤴᤍᤣ ᤁᤣᤕᤠᤰᤐᤠ᤺ ᤋᤢ᤺ᤶ ᤐᤠ᤺ᤴᤌᤱᤛᤠᤒᤠ᤺ ᤛᤱᤁᤷ ᤗᤡᤶᤒᤢᤖᤣ ᤁᤢᤒᤠᤴ ᤕᤢᤰᤂᤢ ॥

ᤈᤡᤸᤗᤠ ᤛᤔᤴᤘᤕ ᤛᤔᤡᤋᤡ ᤕᤢᤰᤋᤢᤶᤒᤠ᤺ ᤈᤕᤐᤪᤁᤠᤛ ᤖᤠᤀᤡ ᤋᤢᤶ ᤋᤖᤣᤒᤠ᤺ ᤁᤣᤘᤠᤒᤠ ᤋᤱᤃᤠᤶᤀᤥ ᤁᤡᤖᤠᤋ᤻ ᤕᤠᤰᤌᤡᤱ ᤆᤢᤶᤗᤢᤱ ᤌᤥᤛᤢᤍᤡᤶᤔᤠ ᤒᤢᤍ᤻ᤍ ᤔᤠᤕᤠ᤺ ᤛᤥᤱᤔᤡ, ᤖᤠᤀᤡ ᤕᤠᤕᤥᤰᤂᤠᤒᤠ ᤌᤥᤛᤢᤍᤡᤶᤔᤠ ᤐᤢᤛ᤻ᤐᤠ ᤖᤠᤀᤡ, ᤏᤣᤐᤠᤸ ᤔᤃᤷ ᤛᤱᤄᤒᤠ ᤀᤡᤛ᤻ᤘᤷ ᤗᤢᤱᤃᤣᤗᤡ ᤔᤃᤷ, ᤋᤔᤢ ᤜ᤻ᤩᤥᤗᤠ᤺ ᤇᤥ᤺ᤈᤎᤡ ᤌᤥᤛᤢᤍᤡᤶᤒᤠ ᤍᤡᤐᤰ ᤃᤢᤖᤢᤱ, ᤋᤠᤔᤠᤱ ᤄᤣᤍᤢᤱ ᤌᤥᤛᤢᤍᤡᤶᤒᤠ ᤋᤡᤁᤠ ᤋᤠᤔᤠᤱ, ᤕᤠᤰᤂᤠ ᤇᤢᤶᤔᤠ᤺ᤖᤣᤴ ᤁᤢᤗᤒᤜᤠᤍᤢᤷ ᤍᤧᤘᤠᤴ, ᤏᤣᤐᤠᤰ ᤀᤠᤍᤡᤒᤠᤛᤡ ᤈᤴᤈᤠᤋᤡ ᤔᤜᤠᤛᤱ (ᤑᤥᤏᤡᤈ) ᤌᤥᤛᤢᤍᤡᤶᤒᤠ ᤕᤠᤶ ᤔᤠᤒᤥᤜᤠᤱ ᤗᤡᤶᤒᤢ ᤏᤢ ᤏᤣᤐᤠᤰ ᤐᤋᤪᤁᤠᤷ ᤔ᤺ᤜᤠᤛᤱ ᤑᤠ᤺ ᤌᤥᤛᤢᤍᤡᤶᤔᤠ ᤛᤢᤏᤡᤋᤠ᤺ ᤂᤠᤗᤡᤱᤜᤠ᤺ᤖᤣ ᤂᤠᤶᤒᤥᤱᤘᤠ ᤕᤢᤰᤗᤠ᤺ᤄᤥᤴ ᤁᤢᤃᤥ ᤁᤢᤓᤠᤱ ᤕᤢᤰᤑᤥᤍᤠᤱᤒᤠᤜᤠ᤺ᤖᤣ ᤆᤥᤰᤔᤠ᤺ ᤁᤣᤒᤥᤱᤒᤠ᤺ ᤐᤠ᤺ᤴ ᤔᤣᤕᤢᤰᤂᤢ ॥

ᤈᤏᤈᤠᤋᤡ ᤔᤜᤠᤛᤅ ᤌᤢᤶ ᤕᤰᤆᤢᤶᤖᤣᤴ ᤌᤥᤛᤢᤍᤡᤶᤒᤠ᤺ ᤀᤓᤡᤛᤣᤰ ᤕᤧᤰᤋᤣᤴᤖᤣ ᤁᤈᤢᤶᤗᤢᤱᤍᤠᤱᤒᤠ᤺ᤀᤥ ᤁᤣᤒᤥᤱᤒᤠ ᤋᤱᤃᤠᤶᤀᤥ ᤑᤥ᤺ᤌᤥᤛᤢᤍᤡᤶᤒᤠ ᤓᤰᤋ ᤌᤠᤔᤡᤖᤣ ᤗᤠ᤺ᤶᤍᤰ ᤆᤥᤃᤢᤷ ᤒᤡᤛ᤻ᤘ ᤀᤠᤍᤡᤒᤠᤛᤡ ᤍᤡᤘᤛᤖᤣᤴ ᤁᤢᤒᤠ᤺ᤴ ᤕᤢᤰᤂᤢᤀᤠᤱ ᤘᤕᤣ ॥ ᤋᤱᤃᤠᤶᤔᤡᤴ ᤛᤢᤜᤠᤱᤔᤡᤔᤠ᤺ ᤖᤴᤈᤡᤋᤠ ᤈᤡᤔᤡ ᤕᤠᤰᤂᤠᤖᤣ ᤀᤡᤈᤠᤰ ᤆᤥᤃᤢ᤺ ॥

᥈᥉ ᤍᤡᤛᤣᤶᤒᤷ ᥇᥏᥏᥊ ᤒᤠ᤺ ᤛᤱᤕᤢᤰᤋ ᤖᤠᤛ᤻ᤋᤛᤱᤄᤖᤣᤴ ᤌᤡᤰᤁᤥᤒᤠ᤺ ᤆᤢᤶᤗᤢᤱᤖᤣ ᥏ ᤀᤃᤛ᤻ᤌᤣᤴ ᤁᤵᤕᤠᤰᤐᤠ᤺ᤱᤃᤣᤒᤠ ᤂᤠᤶᤒᤥᤱᤘᤠ ᤋᤱᤏᤠᤶ ᤋᤥᤶᤔᤠ ᤀᤡᤱᤓᤥᤴ ᤆᤥᤃᤢ ᤘᤕᤣ ॥