75 पटक हेरिएको 
इलाम: अविरल वर्षाले इलाममा एकको मृत्यू हुनका साथै सडक सञ्चालनमा समस्या भएका छन् ।
जिल्ला प्रहरी कार्यालयका अनुसार रोङ गाउँपालिका–४, मानाबुङमा स्थानीय ६० वर्षे वीरबहादुर राई (कान कम सुन्ने)को मृत्यु भएको छ ।
घरबाट करिब तीन सय मिटर पश्चिमस्थित बाटोमा पैदल हिँडिरहेका बेला खोल्सामा एक्कासि लेदोसहित पहिरोले पुरिएर उनको मृत्यु भएको जनाइएको छ ।
इलाम नगरपालिका ९, गोलबस्तीका राकेश थापामगरको टिनको छानो र इँटा–माटोले बनेको २ तले घर आधा भत्किएको छ । वर्षाका कारण जीर्ण घरको दक्षिणतर्फको आधा भाग भत्किदा दुई जना घाइते भएको प्रहरीले जनाएको छ ।
इलाम नगरपालिका ११, सोयाकमा केचना–कञ्चनजंघा मार्गमा पहिरो झर्दा सवारी साधन चल्न बन्द भएका छन् ।
सूर्योदय नगरपालिका ६, हर्कटेबाट गुगल रिसोर्ट जाने बाटामा केसर कटवालको घरको माथिको भागबाट पहिरो गएको छ ।
माई नगरपालिका ९, सोक्तिमस्थित इलाम–बिर्तामोड भित्री सडक खण्डमा रुखसहित पहिरो झरेपछि बाटो अवरोध भएको बताइएको छ ।
फाकफोकथुम गाउँपालिका–१, पचेवास्थित आमचोकदेखि घुर्बिसे पञ्चमी हुँदै राँके इलाम आउने भित्री कच्ची सडक अवरुद्ध भएको छ ।
वर्षाके कारण मेची राजमार्गको विभिन्न स्थानमा लेदो थुप्रिदा सवारी साधन चल्न समस्या छ ।
