ᤓᤢᤔᤡᤁᤠᤖᤧᤴ ᤁᤢᤍᤱᤜᤡᤒᤠ ᤀᤥ ᤕᤠᤰᤌᤢᤱ ᤛᤕᤱ ᤀᤢᤛᤢᤪᤐᤠ᤺ᤴᤈᤧᤰᤐᤠ ᤐᤖᤢᤵ ᤑᤠᤰᤑᤥᤰᤌᤢᤶ ᤀᤡᤗᤠᤶ ᤜᤢᤰᤆᤢᤶ ᤐᤥᤂᤣ

ᤀᤡᤗᤠᤶ: ᤓᤢᤔᤡᤁᤠ ᤑᤡᤕᤠᤰᤖᤣ ᤁᤢᤍᤱᤜᤡᤒᤠ ᤀᤥ ᤕᤠᤰᤌᤢᤱ ᤛᤕᤱ ᤛᤜᤈᤡᤛᤖᤴ ᤛᤔᤢᤜ ᤑᤠᤰᤑᤥᤰᤌᤢᤶ ᤀᤡᤗᤠᤶ ᤜᤢᤰᤆᤢᤶ ᤐᤥᤂᤣ ᤀᤠᤱ ᤘᤠ᤺ ॥ ᤀᤡᤗᤠᤶ ᤐᤠᤱᤈᤢᤶᤀᤥ ᤛᤕᤱᤖᤧ ᤆᤥᤃᤢᤒᤠ᤺ ᤆᤢᤶᤗᤢᤱ ᤏᤢ ᤐᤠ᤺ᤴᤌᤱ ᤋᤱᤃᤠᤶᤔᤡᤸᤗᤧ ᥇᥍ ᤐᤠᤛᤡᤱᤒᤠ᤺ ᤆᤥᤃᤢᤷ ᤛᤱᤈᤡᤶᤋᤥᤴ ᤆᤥᤃᤢᤒᤠᤖᤥ ॥

ᤐᤖᤢᤵᤐᤡᤸᤗᤧᤴ ᤐᤠᤛᤡᤱᤜ᤹᤺ᤀᤥ ᤖᤠᤶ ᤗᤡᤱᤍᤶ, ᤖᤢᤍᤪ ᤌᤣᤒᤣ, ᤒᤡᤛᤠᤶ ᤛᤥᤱᤔᤡ, ᤆᤔᤡᤖᤈᤱ ᤀᤡᤔᤣᤜᤠᤱ, ᤓᤡᤶ ᤕᤧᤰᤋᤣᤴ, ᤁᤢᤔᤠᤷ ᤑᤋᤪ, ᤕᤥᤃᤣᤴᤍᤪ ᤗᤠᤘᤋᤡ, ᤏᤖᤣᤴᤍᤪ ᤑᤡᤕᤠᤰ, ᤍᤡᤐᤰ ᤕᤥᤱᤜᤠᤱ, ᤇᤋᤪ ᤒᤜᤠᤍᤢᤷ ᤛᤱᤒᤠᤱᤑᤣ, ᤏᤖᤣᤴᤍᤪ ᤈᤒᤣᤃᤢ, ᤒᤡᤈᤕ ᤘᤔᤣᤶ ᤑᤠᤃᤥ, ᤗᤥᤰ ᤛᤠᤃᤷ ᤛᤠᤣᤘᤠ, ᤏᤢ ᤋᤣᤰ ᤒᤜᤠᤍᤢᤷ ᤗᤡᤱᤍᤣᤴ ᤜᤠ᤹᤺ ᤔᤧᤘᤠ᤺ ॥

ᤆᤢᤶᤗᤢᤱᤀᤥ ᤀᤢᤛᤪᤢᤐᤠ᤺ᤶᤈᤧᤰᤐᤠ ᤐᤖᤢᤰᤐᤠ᤺ ᤕᤠᤰᤐᤠᤱᤃᤧᤴ ᤐᤠᤱᤔᤡ ᤏᤴᤍ ᤁᤴᤍᤱᤘᤠ ᤏᤢ ᤏᤷ ᤐᤪᤛᤠᤍ ᤗᤢᤶᤑᤢᤱᤘᤠᤖᤣ ᤗᤰᤗᤥᤛᤠᤒᤠᤜᤠᤖᤧᤴ ᤏᤡᤱᤘᤠ ᤛᤧᤴᤍᤥ ᤀᤥ ᤏᤥᤃᤵ ᤐᤡᤖᤧᤳᤇᤢ ॥

ᤋᤱᤃᤠᤶᤀᤥ ᤑᤠᤱᤏᤠᤶᤓᤧ ᤆᤢᤶᤗᤢᤱᤒᤠ ᤐᤠᤛᤡᤱ ᤒᤡᤛ᤻ᤘᤍᤡᤵ ᤗᤡᤱᤍᤧᤴᤖᤧ ᤛᤱᤈᤢᤶ ᤌᤥᤍᤡᤶ ᤀᤥ ᤕᤠᤰᤌᤢᤱ ᤛᤢᤘᤠᤱᤜᤠ᤹ ᤌᤡᤰᤜᤢᤵ ᤐᤥᤱᤔᤠᤀᤠᤱ ᤕᤠᤶᤒᤰ ᤆᤥᤰᤔᤠ ᤁᤧᤒᤥᤱᤒᤠ ᤆ᤺ᤰ ᤐᤠ᤺ᤴ ᤆᤥᤃᤢ ॥

ᤛᤕᤱᤅᤡᤸᤗᤧ ᤀᤠᤒᤠᤅᤣ ᤛᤱᤈᤡᤶᤒᤠ ᤌᤠᤰᤕᤢᤌᤡᤶ ᤀᤡᤛᤡᤰ ᤀᤡ᤺ᤈᤠᤰ ᤁᤣᤒᤥᤱᤒᤠᤷ ᤁᤧᤕᤢᤒᤠ ᤗᤠᤈᤧᤀᤡᤴ ᤛᤱᤈᤢᤶᤔᤡᤒᤠ ᤕᤱᤛᤠᤁᤢᤴᤎᤧ ᤆᤥᤰᤔᤠ ᤋᤧᤴᤇᤠᤒᤠ ᤕᤢᤰᤑᤥᤴᤏᤢ ᤑᤠ᤺ᤛᤡᤱᤔᤠ ᤕᤠᤶᤒᤰ ᤆᤥᤃᤢᤒᤠ ᤔᤧᤒᤠᤋᤢᤀᤠᤱ ᤘᤠ᤺ ॥

ᤀᤠᤏᤡᤖᤧᤴ ᤛᤠᤵᤔᤢᤴᤎᤢᤶᤔᤡᤒᤠ ᤗᤠᤈᤣᤀᤥ ᤀᤠᤒᤠᤅᤣ ᤕᤢᤰᤛᤠᤶ ᤏᤢ ᤀᤡᤳᤕᤱ ᤆᤥᤃᤢᤶ ᤁᤣᤖᤒᤠ ᤔᤢᤰᤐᤠ᤺ᤴ ᤏᤢ ᤛᤥᤖᤡᤰ ᤐᤖᤢᤵᤐᤡᤰᤗᤧ ᤀᤠᤒᤠᤅᤧ ᤕᤢᤰᤛᤠᤶᤛᤡᤃᤠᤱᤒᤠ ᤐᤠ᤺ᤱᤓᤧᤒᤠ ᤌᤥᤍᤡᤶ, ᤀᤠᤒᤠᤅᤣ ᤐᤠ᤺ᤴ, ᤛᤠᤵᤙᤰ, ᤛᤠᤰᤌᤡᤶ, ᤆᤥᤰᤌᤡᤶᤒᤠ ᤗᤠᤈᤧ, ᤕᤠᤱᤏᤡᤶᤒᤢᤱ, ᤀᤠᤒᤠᤅᤧᤀᤡᤛᤡᤰᤐᤠ᤺ ᤋᤠᤶᤓᤢᤱ, ᤀᤡᤵᤐᤢᤱ, ᤔᤠᤱᤃᤧᤴᤏᤠ ᤕ᤺ᤰ, ᤔᤢᤴᤎᤢᤶᤋᤧᤴᤗᤧᤴ ᤋᤠᤱᤛᤧᤵ ᤏᤢ ᤌᤥᤍᤡᤶ ᤆᤥᤰᤔᤠᤷ ᤁᤵᤕᤠᤰᤐᤠ᤺ᤱᤃᤧᤒᤠ ᤁᤢᤓᤠᤱᤖᤧ ᤐᤠᤳᤋᤢᤒᤠ ᤀᤡᤛᤡᤰᤐᤠ᤺ ᤆᤥᤰᤔᤠᤷ ᤀᤠᤒᤠᤅᤧ ᤌᤠᤰᤕᤢᤌᤡᤶᤒᤠ ᤗᤠᤈᤧᤀᤡᤴ ᤕᤢᤰᤛᤡᤱ ᤆᤥᤃᤢᤒᤠ ᤐᤠ᤺ᤴ ᤘᤠ᤺ ॥

ᤒᤠᤄᤴᤏᤢ ᤛᤥᤖᤡᤰ ᤔᤠ᤺ᤛᤡᤱᤔᤠ ᤁᤧᤀᤡᤵᤐᤠ᤺ ᤕᤰᤌᤢᤱᤒᤠᤜᤠ᤹ᤖᤧᤴ ᤌᤰᤕᤢᤌᤡᤶᤒᤠ᤺ ᤆᤢᤶᤓᤥᤴ ᤛᤢᤘᤠᤱᤛᤠᤒᤠ ᤁᤧᤕᤢᤱᤒᤠ ᤋᤧᤴ ᤀᤥ ᤕᤢᤰᤛᤡᤱ ᤆᤥᤃᤢᤷ ᤂᤧᤴᤜᤠ᤹ᤖᤧᤴ ᤂᤠᤛᤧᤴ ᤏᤢ ᤕᤢᤰᤌᤡᤶ ᤆᤥᤰᤔᤠ ᤏᤠᤶᤓᤧᤍᤡᤶᤒᤠ ᤕᤶᤒᤰ ᤆᤥᤃᤢᤷ ᤋᤧᤖᤢᤒᤠ ᤗᤠᤴᤗᤥᤒᤠᤜᤠ᤹ᤖᤣ ᤔᤧᤒᤠᤋᤢᤀᤠᤱ ᤘᤠ᤺ ॥