स्टार्टअप उद्यम कर्जा के हो, कसरी लिने ?

रकम कहिले हात पर्छ

मूल्याङ्कन समितिले मूल्याङ्कन गरेपश्चात्‌ प्रतिष्ठानले आवेदकहरूको प्रारम्भिक सूची निकालिन्छ र त्यसपछि व्यावसायिक योजना प्रस्तुतीकरणको काम हुने गुप्ता बताउँछन्।

“माग गरिएजति रकम आवश्यक छ कि छैन भनेर व्यावसायिक योजना प्रस्तुतीकरणका क्रममा मूल्याङ्कन समितिले हेर्छ अनि निर्णय गरेर वाणिज्य ब्याङ्कलाई कर्जाका लागि सिफारिस गर्छ,” कार्यकारी निर्देशक गुप्ताले भने।

“त्यसपछि वाणिज्य ब्याङ्कले पनि स्थलगत अध्ययन गरेर कर्जाबारे निर्णय गर्छ।”

उनका अनुसार यसपालि ४०० जनालाई उक्त कर्जा उपलब्ध गराउने लक्ष्य लिइएको छ र त्यसका लागि सरकारले ७३ करोड रुपैयाँ छुट्ट्याएको छ।

“आवेदनका आधारमा यो कर्जा पाउनेहरूको सङ्ख्या बढ्न पनि सक्छ। उदाहरणका लागि, अघिल्लो वर्ष ५०० जनालाई दिने तोकिएकोमा सङ्ख्या बढेर ६६१ जनाले पाएका थिए,” गुप्ताले भने।

“अनि अघिल्लो वर्ष कर्जा प्रवाहमा केही ढिलाइ भएको भए पनि यसपालि माघसम्ममा दिइसक्ने हाम्रो लक्ष्य छ।”

कति प्रभावकारी

यो कर्जाको प्रभावकारिताबारे राज्यको तर्फबाट ठोस अध्ययन भइसकेको छैन। तर नतिजा राम्रो देखिएको अधिकारीहरूको दाबी छ।

आर्थिक वर्ष २०८०/०८१ मा आरम्भ भएको यो कार्यक्रमले त्यसयता निरन्तरता पाइरहेको छ।

“प्रभावकारिता सम्बन्धमा हामीले अध्ययन गरिसकेका छैनौँ, तर आर्थिक गतिविधि बढेको जस्तो देखिन्छ। लिएकाहरूले आम्दानी गर्दै हुनुहुन्छ, केही रोजगारी सिर्जना पनि भएको छ,” कार्यकारी निर्देशक गुप्ताले भने।

उनका अनुसार कर्जा लिइएको रकममध्ये अहिलेसम्म २ करोड ९० लाख रुपैयाँ फिर्ता पनि भइसकेको छ। @bbc.comबाट ।