‘ᤛᤣ᤺ᤰᤛᤡᤱᤀᤥ ᤕᤠᤰᤌᤢᤱ ᤀᤈᤧᤴᤍᤠ ᤁᤧᤍᤧᤶᤒᤠ, ᤁᤧᤍᤰᤐᤠ ᤏᤢ ᤀᤥᤃᤠᤵᤗᤠᤒᤧᤴ ᤏᤠ᤺ᤴᤒᤠᤱᤛᤡ’ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱᤖᤧᤴ ᤀᤐᤡᤸ

ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱᤖᤧ ᤋᤢ᤺ᤴᤍᤣ (ᤀᤈᤧᤴᤍᤠ)ᤜᤠ᤹ ᥇. ᤛᤱᤂᤢᤘᤠ-ᤀᤖᤢᤴ-ᤛᤵᤋᤁᤥᤛᤡ ᤏᤠᤶᤃᤧᤴᤒᤠ ᥏ ᤌᤢᤶᤜᤠ᤹ ‘ᤗᤡᤶᤒᤢᤘᤠᤴ ᤀᤡ᤺ᤳᤕᤱ ᤗᤠᤈᤣ᤹’ ᤕᤢᤰᤛᤡᤱ ᤆᤠᤣ᤺ᤰᤔᤠ ᤁᤧᤒᤠᤣ᤺ᤱᤒᤠ, ᤀᤖᤢᤴ-ᤛᤵᤋᤁᤥᤛᤡ ᤏᤠᤶᤃᤧᤴ ᤏᤢ ᤏᤠᤶᤎᤠᤒᤠ ᤏᤧᤵᤔᤠᤱ ᤋᤧᤱᤃᤵᤐᤠ ᥇᥊ ᤌᤢᤶᤜᤠ᤹ᤖᤧ ᤂᤠᤶᤃᤵᤀᤥ ᤁᤧᤏᤧᤒᤠ ᤂᤠᤶᤄᤢ ᤏᤶᤒᤷ ᥇ ᤖᤧ ᤁᤢᤜᤠᤱᤃᤧᤶ ᤛᤢᤘᤠᤱ ᤏᤢ ᤐᤖᤢᤵᤖᤧ ᤂᤢᤴᤇᤡ᤹ ᤁᤢᤏᤢᤶ ᤛᤢᤘᤠᤱᤍᤧᤶᤒᤠ ᤏᤡᤛᤢᤶ ᤁᤢᤏᤠᤠ᤺ᤶᤓᤣᤒᤠ ᤃᤥᤋᤪᤡᤕ ᤁᤥᤛᤡ ᤔᤡᤱ ᤂᤠᤖᤥᤋᤡ ᤆᤠᤣ᤺ᤰᤔᤠᤀᤠᤱ ᤁ᤹ᤀᤥᤒᤠ ᤛᤠᤵᤔᤢᤴᤎᤢᤶᤔᤡᤒᤠ ᤂᤠᤶᤃᤵ ᤏᤢ ᤂᤠᤛᤠᤶᤖᤧ ᤁᤢᤏᤠᤠ᤺ᤶᤓᤣᤀᤥ ‘ᤗᤡᤶᤒᤢᤘᤠᤴ, ᤁᤡᤖᤠᤋ᤻’ ᤔᤡᤱ ᤘᤠ᤺ᤶᤔᤠ ᤁᤧᤒᤠᤣ᤺ᤱᤒᤠ,

᥈. ᤔᤢᤴᤎᤢᤔᤡ ᤕᤠᤶᤍᤡᤶᤘᤠ ᤋᤧᤴ ᤔᤢᤰᤁᤢᤶᤗᤢᤱ ᤋᤧᤱᤃᤵᤀᤥ ᤁᤧᤒᤸ ᤁᤠᤷ ᤂᤡᤶᤔᤠᤥ ᤂᤠᤖᤥᤋᤡ ᤏᤢ ᤑᤧᤕᤧᤏᤢᤒᤠ ᤋᤡᤸᤗᤡᤱᤃᤠ ᤂᤡᤶᤔᤥ ᤏᤢ᤺ᤱᤔᤠᤛᤡ ᤜᤧᤰᤁᤣᤀᤠᤱ ᤔᤢᤰᤁᤢᤶᤗᤢᤱ ᤋᤠᤱᤛᤧ᤺ᤵ ᤏᤢ ᤌᤥᤒᤥ ᤆᤠᤣ᤺ᤰᤛᤧ ‘ᤔᤢᤰᤁᤢᤶᤗᤢᤱ ᤔᤢᤴᤎᤢᤔᤡ ᤋᤧᤴ ᤌᤥᤒᤥ ᤛᤈᤢᤶ’ ᤕᤢᤰᤛᤡᤱ ᤆᤠᤣ᤺ᤰᤔᤠ ᤁᤧᤒᤠᤣ᤺ᤱᤒᤠ,

᥉. ᤕᤠᤰᤌᤢᤱ/ᤗᤡᤶᤒᤢ ᤐᤠ᤺ᤴᤀᤡᤴ ᤕᤢᤰᤑᤥᤒᤠ ᤕᤠ᤺ᤶᤒᤰ ᤐᤠ᤺ᤴ ᤆᤠᤣ᤺ᤰᤛᤧ ᤂᤠᤶᤄᤢ ᤏᤶᤒᤷ ᥇ ᤀᤥ ᤐᤥᤈᤠᤣ᤺ᤰᤀᤥ ᤁᤧᤘᤠ᤹ᤒᤠ ᤁᤢᤏᤠᤁᤢᤀᤡ᤺ᤳ ᤐᤠᤱᤅᤧᤶᤓᤠᤱ ᤑᤠᤱᤈᤡᤗᤠᤀᤡᤴ ᤂᤡᤶᤔᤥ ᤐᤠᤛ᤻ ᤆᤠᤣ᤺ᤰᤔᤠᤀᤠ ᤕᤠ᤺ᤶᤒᤰᤀᤥ ᤁᤣ᤺ᤳᤇᤧ ᤑᤠ᤹ᤔᤠ ᤁᤧᤒᤠᤣ᤺ᤱᤒᤠ,

᥊. ᤏᤧᤐᤠᤸᤖᤧ ᤋᤧᤴᤍᤡᤱ ᤆᤥᤃᤢᤛᤡᤒᤠ ᤁᤵᤕᤠᤰᤐᤱᤃᤣᤒᤠ ᤁᤢᤓᤠᤱ, ᤏᤧᤐᤠᤸᤒᤠ ᤑᤠᤱᤏᤠᤶᤓᤣᤒᤠ ᤋᤱᤈᤧᤶ ᤏᤢ ᤛᤠᤱᤈᤱ ᤂᤠᤛᤧᤴᤜᤡᤶᤖᤧ ᤁᤢᤀᤡᤱᤈᤠᤱ ᤀᤡᤛᤡᤰ ᤗᤡᤶᤒᤢᤘᤠᤴ ᤏᤢ ᤗᤠᤈᤣ᤹ ᤁᤢᤍᤡᤶᤒᤠ ᤂᤠᤶᤒᤠᤣ᤺ᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢᤴᤎᤢᤶᤔᤡᤒᤠ ᤂᤠᤶᤃᤵᤐᤠ ᤕᤢᤰᤐᤢᤱᤀᤥ ᤀᤡ᤺ᤳᤕᤱ, ᤐᤠᤱᤅᤧᤶ ᤏᤢ ᤋᤠᤱᤛᤧ᤺ᤵᤐᤡᤒᤠ ᤋᤧᤱᤃᤵᤜᤠ᤹ ᤆᤠᤣ᤺ᤰᤔᤠᤀᤠᤱ ᤀᤠᤒᤠᤱᤒᤠ-ᤜᤠᤱᤃᤧᤶ, ᤀᤡ᤺ᤳᤕᤱᤘᤠ, ᤁᤠᤰᤕᤢᤰᤛᤧ᤺ᤵ ᤏᤢ ᤛᤠᤶᤂᤠᤛᤣ᤺ᤰᤐᤠ ᤕᤢᤰ ᤛᤥᤖᤡᤰᤐᤠ ᤂᤠᤶᤒᤠᤠᤣ᤺ᤱᤒᤠᤜᤠ᤹ᤖᤧ ᤋᤧᤱᤃᤵᤀᤥ ᤋᤃᤠᤱᤛᤢᤔᤠ ᤏᤥᤀᤡᤱᤄᤥᤒᤠ ᤆᤠᤣ᤺ᤰᤕᤢᤶᤒᤠ ᤀᤡᤱᤍᤧᤶ ᤕᤢᤰ ᤀᤥᤃᤠᤵᤀᤥ ᤋᤠ᤺ᤵᤔᤠ ᤏᤢ ᤛᤥᤖᤡᤰ UNDRIP ᤏᤢ ILO 169 ᤀᤡᤛᤡᤰ ᤁᤢᤓᤠᤱ ᤆᤠᤣ᤺ᤰᤔᤠ ᤏᤢ ᤕᤠ᤺ᤶᤒᤰᤀᤥ ᤋᤠ᤺ᤵᤔᤠ ᤐᤠᤣ᤺ᤱᤒᤠ,

᥋. ᤕᤠᤰᤌᤢᤱ ᤐᤠ᤺ᤴ ᤏᤢ ᤛᤥᤖᤡᤰ ᤂᤠᤶᤒᤠᤠᤣ᤺ᤱᤒᤠ ᤔᤠᤒᤠ᤺ᤴ ᤏᤡ᤺ᤵᤔᤠ ᤜᤢ᤹ᤛᤧ ᤛᤡᤰᤛᤠᤶᤒᤠ ᤛᤡᤰᤛᤠᤶᤔᤠ ᤕᤢᤰᤑᤠᤱ ᤏᤢ ᤔᤢᤴᤎᤢᤶ ᤏᤡ᤺ᤳᤇᤠᤶᤀᤡᤴ ᤏᤡ᤺ᤳᤇᤠᤶ ᤐᤠᤱᤅᤧᤶᤓᤠᤱᤀᤥ ᤏᤡᤛ᤻ᤛᤣ ᤆᤠᤣ᤺ᤰᤏᤢ ᤕᤠ᤺ᤶᤒᤰᤀᤥ ᤁᤣ᤺ᤵᤔᤠ ᤐᤠᤣ᤺ᤱᤒᤠ ᤏᤢ ᤂᤠᤶᤄᤢ ᤏᤶ, ᥇ ᤐᤠ ᤁᤠᤰᤋᤥᤒᤠ ᤛᤜᤠᤱᤕᤢᤰᤜᤠ᤹ᤀᤥ ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤛᤰ ᤏᤢ ᤕᤠᤰᤌᤢᤱ ᤐᤠ᤺ᤴᤀᤥ ᤒᤥᤷᤍ᤻ ᤕᤢᤱᤔᤠ ᤐᤠᤣ᤺ᤱᤒᤠ,

᥌. ᤏᤧᤐᤠᤸᤒᤠ ᥋᥏ ᤂᤠᤶᤒᤠᤠᤣ᤺ᤱᤒᤠᤖᤧ ᤑᤠ᤹ᤀᤠᤱ ᤂᤠᤶᤒᤠᤣ᤺ᤱᤒᤠ ᤕᤢᤰ ᤏᤢ ᤆᤢᤶᤓᤥᤛᤈᤢᤶ ᤐᤠᤱᤅᤧᤶᤓᤠᤱ ᤆᤠᤣ᤺ᤰᤔᤠᤠᤀᤠᤱ ᤕᤠ᤺ᤶᤒᤰᤀᤥ ᤁᤣ᤺ᤵᤔᤠ ᤐᤠᤣ᤺ᤱᤒᤠ,

᥍. ᤕᤠᤠᤰᤌᤢᤱ/ᤗᤡᤶᤒᤢ ᤏᤢ ᤘᤣ᤹ ᤂᤠᤶᤒᤠᤠᤣ᤺ᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛ᤺ᤱᤈᤢᤶᤔᤡᤒᤠ ᤐᤠᤱᤔᤡᤘᤠ ᤆᤢᤶᤓᤥᤍᤡᤱ ᤕᤧᤓᤠᤱᤗᤢᤱ (ᤕᤥᤛᤢ ᤕᤧᤓᤠᤱ ᤏᤢ ᤌᤥᤛᤢ ᤕᤧᤓᤠᤱ), ᤂᤠᤶᤄᤢ ᤕᤧᤓᤠᤱ ᤏᤢ ᤋᤧᤴᤇᤠᤒᤠ ᤋᤠᤰᤑᤠᤀᤥ ᤛᤠᤠᤵᤔᤢᤴᤎᤢᤶᤔᤡᤒᤠ ᤂᤠᤶᤃᤵᤖᤧ ᤁᤢᤏᤠ᤺ᤶᤓᤣᤀᤥ ᤁᤠᤕᤶ ᤕᤢᤱᤔᤠ ᤐᤠᤣ᤺ᤱᤒᤠ,

᥎. ᤁᤧᤖᤧᤰ ᤛᤠᤶᤕᤥᤒᤠ ᤛᤠ᤺ᤰᤌᤡᤶᤔᤡᤒᤠ ᤛ᤺ᤱᤈᤢᤶᤜᤠ᤹ ᤂᤢᤴᤇᤡ᤹ ᤀᤠᤒᤠᤱᤅᤣ ᤛᤠᤶᤕᤥ, ᤛᤠ᤺ᤰᤌᤡᤶ ᤋᤥᤕᤧᤶᤀᤥ ᤁᤢᤍᤱᤒᤠ ᤕᤢᤰᤑᤥᤃᤧᤴ ᤏᤠᤠ᤹ᤛᤡᤱᤕᤧᤴ ᤏᤢ ᤆᤡᤔᤢ ᤐᤡ᤹ᤔᤠᤛᤡ ᤐᤠᤣ᤺ᤱᤒᤠ,

᥏. ᤗᤡᤶᤒᤢᤘᤠᤠᤴᤒᤠ ᤛᤠᤠᤵᤔᤢᤴᤎᤢᤶᤔᤡᤒᤠᤠ, ᤔᤢᤴᤎᤢᤔᤡᤒᤠ, ᤀᤢᤏᤠᤈᤥᤑᤵᤕᤠ, ᤔᤠᤱᤃᤧᤴᤏᤠ᤹ ᤕᤰ, ᤛᤠᤶᤕᤥᤒᤠ ᤏᤢ ᤛᤠ᤺ᤰᤌᤡᤶᤔᤡᤒᤠ ᤋᤧᤴᤜᤠ᤹ ᤋᤠᤱᤛᤧ᤺ᤵᤔᤠ ᤌᤡᤶᤍᤡ᤺ᤰ ᤏᤢ ᤁᤢᤓᤠᤱ ᤆᤠᤣ᤺ᤰᤔᤠᤀᤠᤱ ᤕᤠ᤺ᤶᤒᤰᤀᤥ ᤁᤣ᤺ᤵᤔᤠᤠ ᤁᤧᤒᤠᤣ᤺ᤱᤒᤠ, ᤂᤧᤴ ᤋᤧᤴᤜᤠ᤹ ᤑᤧᤳᤁᤧᤗᤠ᤺ᤶᤒᤠ ᤆᤢᤘᤠᤛᤠᤠ᤺ᤶᤓᤣ, ᤔᤠᤠᤖᤠᤶ, ᤆᤱᤜᤡᤶ ᤜᤧᤰᤁᤣᤒᤠ ᤀᤠᤳᤋᤡᤴᤇᤠᤱ ᤁᤠᤰᤏᤡᤱᤛᤣ᤺ᤰᤜᤠᤠ᤹ ᤂᤠᤖᤥᤋᤡ ᤏᤢ ᤋᤠᤕᤧᤶᤀᤥ ᤛᤠᤰᤔᤠᤛᤡ ᤐᤠᤣ᤺ᤱᤒᤠ, ᤂᤧᤴ ᤏᤢ ᤛᤥᤖᤡᤰ ᤗᤡᤶᤒᤢᤘᤠᤴᤒᤠ ᤖᤠᤀᤡᤁᤷ ᤂᤠᤶ ᤐᤜᤡᤰᤐᤠ ᤆᤢᤘᤠ, ᤋᤠᤶᤓᤢᤱ, ᤂᤠᤶᤒᤣ᤺ᤰ, ᤕᤠᤱᤏᤡ᤺ᤶᤔᤠ ᤏᤢ ᤌᤠ᤺ᤰᤕᤢᤍᤡ᤺ᤰᤘᤠᤒᤠ ᤋᤠᤒᤢᤱ ᤕᤠᤰᤌᤢᤱ ᤛᤡᤃᤠᤱᤒᤠ ᤁᤠ᤹ᤀᤡᤖᤥᤒᤠ ᤛ᤺ᤱ, ᤌᤠ᤺ᤰᤖᤧ ᤔᤡᤱᤀᤥ ᤛᤠᤵᤔᤠ, ᤋᤠᤱᤛᤧ᤺ᤵᤔᤠ, ᤀᤥᤎᤰ, ᤀᤥᤃᤠᤆᤠᤀᤡᤴ ᤏᤡᤛ᤻ᤛᤣ ᤆᤠᤣ᤺ᤰᤔᤠ ᤐᤠᤣ᤺ᤱᤒᤠ,

᥇᥆. ᤗᤡᤶᤒᤢᤘᤠᤴ ᤋᤧᤱᤃᤵᤐᤠ ᤛᤠᤵᤔᤢᤴᤎᤢᤶᤔᤡᤒᤠ, ᤋᤧᤴᤇᤠᤒᤠ ᤋᤧᤴ ᤔᤡᤱ ᤏᤢ ᤁᤢᤛᤱ ᤔᤧᤈᤠᤣ᤺ᤰᤛᤡᤱᤒᤠ ᤁᤧᤖᤧᤰ ᤁᤢᤈᤠᤣ᤺ᤰᤆᤥᤜᤠ᤹ ᤕᤠᤰᤌᤢᤱ/ᤗᤡᤶᤒᤢ ᤐᤠ᤺ᤴᤀᤥ ᤔᤡᤱᤘᤠ᤺ᤶᤔᤠ ᤏᤢ ᤛᤥᤖᤡᤰ ᤂᤛ᤻ ᤐᤧᤏᤡ ᤔᤡᤱᤔᤧᤗᤧᤰᤂᤢᤛᤡᤒᤠ ᤏᤢ ᤛᤱᤛ᤻ᤁᤪᤡᤳ ᤔᤡᤱᤗᤧᤱᤂᤢᤛᤡᤒᤠ ᤋᤧᤴ ᤔᤡᤱᤜᤠ᤹ ᤕᤠᤰᤌᤢᤱ/ᤗᤡᤶᤒᤢ ᤐᤠ᤺ᤴᤒᤠ ᤋᤃᤠᤱᤒᤠ ᤔᤡᤱᤀᤥ ᤀᤣ ᤏᤢ᤺ᤱᤔᤠ ᤐᤠᤣ᤺ᤱᤒᤠ,

᥇᥇. ᤗᤡᤶᤒᤢᤘᤠᤴᤀᤥ ᤕᤠᤰᤌᤢᤱ/ᤗᤡᤶᤒᤢ ᤀᤠᤶᤒᤠᤣ᤺ᤱᤒᤠ ᤏᤢ ᤗᤠᤈᤣ᤹ ᤁᤢᤍᤡᤶᤒᤠ ᤁᤧᤖᤧᤰ ᤂᤠᤶᤒᤠᤣ᤺ᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢᤴᤎᤢᤶᤔᤡᤒᤠ ᤂᤠᤶᤃᤵᤀᤥ ᤀᤡ᤺ᤴᤃᤠᤵ ᤔᤧᤈᤥᤃᤢᤛᤡᤒᤠ ᤏᤢ ᤔᤧᤏᤠᤵᤋᤢᤛᤡᤒᤠᤠ ᤂᤠᤶᤒᤣ᤺ᤰᤀᤡᤴ ᤏᤢ᤺ᤱᤔᤠᤀᤠᤱ ᤁᤠ᤹ᤀᤡᤖᤥᤒᤠ ᤛ᤺ᤱᤈᤢᤶᤖᤧ ᤁᤢᤛᤧ᤺ᤵ, ᤀᤥᤎᤰ ᤏᤢ ᤀᤥᤃᤠᤵᤆᤠᤔᤠ ᤋᤱᤈᤧᤱ ᤏᤡᤛ᤻ᤛᤣ ᤆᤠᤣ᤺ᤰᤔᤠ ᤐᤠᤠᤣ᤺ᤱᤒᤠ,

᥇᥈. ᤗᤡᤶᤒᤢᤘᤠᤴ ᤗᤠᤈᤣ᤹ᤀᤥ ᤕᤠᤰᤌᤢᤱ ᤏᤢ ᤂᤧ᤹ᤀᤥᤒᤠ ᤋᤧᤴᤇᤠᤒᤠ ᤂᤠᤶᤒᤠᤣ᤺ᤱᤒᤠᤜᤠ᤹ ᤕᤢᤰᤑᤥᤒᤠ ᤕᤠᤠ᤺ᤶᤈᤥᤒᤠ, ᤏᤡ᤺ᤳᤇᤠᤶ, ᤂᤠᤛᤧᤴ, ᤋᤠᤱᤛᤧ᤺ᤵ ᤏᤢ ᤛᤥᤖᤡᤰ ᤁᤧᤖᤧᤰ ᤜᤠᤱᤃᤵ ᤆᤡᤔᤢᤒᤠ ᤁᤠᤰᤋᤥᤒᤠ ᤆᤡᤔᤢᤜᤠ᤹ᤀᤥ ᤋᤰᤐᤢᤱᤘᤠᤀᤠᤠᤱ ᤕᤢᤰᤋᤡᤱ ᤐᤡ᤹ᤔᤠᤠᤛᤡ ᤐᤠᤠᤣ᤺ᤱᤒᤠ,

᥇᥉. ᤕᤠᤰᤌᤢᤱ/ᤗᤡᤶᤒᤢ ᤂᤠᤶᤒᤠᤣ᤺ᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤗᤠ᤹ᤒᤠᤠ ᤏᤢ ᤔᤧ᤺ᤴᤛᤢᤗᤠᤠ᤹ᤒᤠ ᤁᤢᤴᤎᤣᤜᤠ᤹ ᤛᤧ᤺ᤵᤔᤠᤠᤛᤡ ᤐᤠᤣ᤺ᤱᤒᤠᤠ ᤏᤢ ᤕᤠᤠᤰᤌᤢᤱ ᤛ᤺ᤱᤈᤢᤶᤖᤧ ᤛᤠᤠ᤺ᤰᤌᤡᤶ, ᤛᤠᤶᤕᤥ ᤏᤢ ᤔᤢᤴᤎᤢᤔᤡ ᤕᤠᤶᤍᤡᤶᤘᤠᤒᤠᤠ ᤋᤧᤴ ᤏᤠᤘᤠᤀᤥ ᤀᤥᤎᤰ ᤏᤢ ᤀᤥᤃᤠᤵᤆᤠ ᤔᤧᤈᤥᤃᤢᤖ ᤔᤧᤘᤠᤠ᤹ᤒᤠ ᤂᤠᤶᤒᤣ᤺ᤰᤔᤠ ᤁᤠ᤹ᤀᤡᤖᤥᤒᤠ ᤆᤢᤶᤓᤥ ᤕᤠᤠ ᤛ᤺ᤱᤈᤢᤶᤖᤧ ᤔᤡᤱᤀᤥ ᤁᤢᤓᤠᤱᤃᤧᤴ ᤏᤠᤘᤠᤀᤥ ᤔᤡᤱᤛᤠᤵᤔᤠ ᤏᤢ ᤛ᤺ᤱᤈᤢᤶᤔᤡᤒᤠ ᤋᤠᤱᤛᤧ᤺ᤵ, ᤀᤥᤎᤰ ᤏᤢ ᤀᤥᤃᤠᤠᤠᤵᤆᤠᤖᤧ ᤁᤠᤰᤕᤢᤰ ᤐᤡ᤹ᤔᤠ ᤐᤠᤣ᤺ᤱᤒᤠ,

᥇᥊. ᤏᤥ ᤁᤥᤛᤡ ᤏᤢ ᤏᤠᤥ ᤁᤧᤒᤸ ᤁᤠᤷ ᤌᤠᤰᤛᤠᤠᤱᤀᤥ ᤀᤡᤱᤗᤧᤰᤐᤠ ᤋᤢ᤺ᤴᤍᤣᤀᤥ ᤔᤧᤎᤠᤛᤢᤛᤡᤀᤠᤱ ᤐᤢᤱᤗᤠᤜᤡᤶᤀᤥ ᤔᤧᤕᤢᤰᤂᤢᤒᤠ ᤀᤠᤛᤡᤛ᤻ ᤛᤠᤶᤒᤠ ᤏᤢ ᤁᤧᤖᤧᤰ ᤀᤡᤱᤗᤧᤰᤐᤠ ᤋᤢ᤺ᤴᤍᤣᤜᤠ᤹ ᤂᤠᤖᤥᤋᤡ ᤆᤠᤣ᤺ᤰᤔᤠᤀᤠᤱ ᤁᤧᤖᤧᤰ ᤛᤠᤠᤶᤒᤠ᤺ᤴ ᤗᤠᤶ ᤛᤧᤴᤗᤵ ᤂᤥᤔᤠ ᤐᤠᤣ᤺ᤱᤒᤠᤠ ᤏᤢ ᤀᤡᤱᤗᤧᤰᤐᤠ ᤋᤢ᤺ᤴᤍᤣ ᤔᤧᤃᤢ᤺ᤳᤋᤢᤛᤡᤒᤠ ᤜᤧᤰᤁᤣᤀᤠᤱ ᤁᤧᤃᤠ᤺ᤶᤒᤠᤠᤠ ᤌᤰᤛᤠᤱᤒᤠ ᤌᤰᤛᤠᤱᤔᤠᤜᤠ᤹ ᤕᤢᤰᤑᤥᤖᤧ ᤛᤠᤱᤃᤧᤴᤕᤥ᤹ᤗᤧᤶ ᤐᤡᤶᤔᤠᤛᤡ ᤐᤠᤣ᤺ᤱᤒᤠ॥