222 पटक हेरिएको 
ᤀᤡᤗᤠᤶ: ᤂᤠᤶᤒᤥᤱᤘᤠ ᤕᤢ᤺ᤰ ᤗᤠ᤺ᤄᤥ ᤂᤥᤔᤠ ᤂᤠᤶᤒᤥᤱᤘᤠ ᤛᤢᤘᤠᤱᤜᤠ᤹᤺ ᤌᤡᤰᤜᤢᤵ ᤐᤥᤱᤔᤠ ᤕᤧᤰᤕᤠ᤺ ᤘᤠ᤺ᤒᤠ ᤛᤧᤴᤇᤪᤣᤱᤒᤠ ᤕᤧᤴ ᤀᤡᤗᤠᤶ ᤐᤠᤱᤈᤢᤶ ᤀᤥ ᤁᤣᤒᤥᤱᤒᤠ ᤌᤡᤰ ᤋ᤺ᤱᤃᤠᤶᤀᤥ ᤔᤣᤒᤠᤋᤢ ॥
᥉᥇ ᤋᤱᤒᤣᤒᤠ᤺ ᤒᤡᤛ᤻ᤘ ᤀᤠᤍᤡᤘᤠᤛᤡ ᤒᤡᤘᤛᤖᤣᤴ ᤛᤢᤕᤣᤶ ᤀᤥ ᤀᤠᤍᤡᤘᤠᤛᤡ ᤈᤏᤈᤠᤋᤡ ᤔ᤺ᤜᤠᤛᤱ ᤌᤢᤶ ᤕᤰᤆᤢᤶᤖᤣ ᤖᤣ ᤆᤥᤃᤢᤒᤠ ᤐᤠ᤺ᤴᤌᤱ ᤋᤱᤃᤠᤶᤀᤥ ᤐᤠ᤺ᤴ ᤁᤣᤕᤢᤱᤒᤠ᤹ᤜᤠ᤺ᤖᤣ ᤂᤠᤶᤒᤥᤱᤘᤠ ᤛᤢᤘᤠᤱᤜᤠ᤹᤺ ᤕᤢ᤺ᤰ ᤗᤠ᤺ᤄᤥ ᤀᤥᤃᤠᤵ ᤆᤥᤰᤔᤠ᤺ ᤂᤠᤶᤒᤥᤱᤘᤠ᤹ᤜᤠ᤺ ᤌᤡᤰᤜᤢᤵ ᤐᤥᤱᤔᤠ᤹ᤀᤠᤱ ᤕᤠᤶᤒᤰ ᤆᤥᤰᤔᤠ᤺ ᤁᤣᤒᤥᤱᤒᤠ ᤆ᤺ᤰ ᤐᤠ᤺ᤴ ᤔᤧᤕᤢᤰᤂᤢ ॥
ᤕᤠᤱᤏᤡᤶᤓᤢᤱ ᤆᤢᤘᤠᤳ, ᤂᤠᤶᤒᤣᤰ ᤏᤢ ᤋᤠ᤺ᤶᤓᤢᤱᤀᤥ ᤂᤠ᤺ᤶᤒᤥᤱᤘᤠ ᤛᤢᤘᤠᤱᤖᤣᤴ ᤕᤢ᤺ᤰ ᤗᤠ᤺ᤄᤥ ᤂᤥᤔᤠ ᤏᤡᤴᤎᤥ ᤆᤥᤰᤔᤠ, ᤀᤴᤍᤪᤡᤵ ᤏᤢ ᤀᤠᤀᤡᤀᤣᤗᤀᤥ ᥇᥌᥏ ᤖᤧᤴ ᤐᤠ᤺ᤴᤍᤠᤀᤥ ᤛᤠᤱᤓᤠᤱᤗᤢᤱᤖᤧ ᤀᤥᤴᤎᤠᤰ ᤆᤥᤃᤢᤒᤠ ᤀᤡᤛᤡᤰ ᤕᤠᤶᤒᤰ ᤆᤥᤰ ᤐᤠᤱᤔᤠ᤺, ᤐᤠ᤺ᤴᤍᤠᤀᤥ ᤏᤣᤐᤠᤸᤁᤠ ᤀᤠᤍᤡᤒᤠᤛᤡᤜᤖᤢᤁᤥ ᤔᤠᤏᤒ ᤀᤎᤡᤁᤠᤷ ᤛᤶᤒᤴᤎᤡ ᤘᤁᤡᤗ ᤛᤔᤢᤜ (ᤗᤠ᤺ᤜᤢᤷᤏᤡᤵ) ᤗᤠᤶᤒᤠ᤺ ᤖᤡᤋ᤻ ᤋᤢᤴᤍᤣ ᤁᤣᤕᤠᤰᤐᤠ᤺ ᤂᤠᤛᤢᤛᤠᤒᤠ᤺ ᤛᤱᤁᤷ ᤗᤡᤶᤒᤢᤖᤣ ᤁᤥᤕᤣᤶᤀᤥ ᤂᤠᤶᤒᤥᤱᤘᤠᤜᤠᤖᤣᤴ ᤕᤠᤶᤒᤰ ᤆᤥᤰᤔᤠ ᤂᤠᤶᤒᤥᤱᤘᤠ᤹ ᤛᤢᤘᤠ᤺ᤱᤜᤠ᤹ ᤌᤡᤰᤜᤢᤵ ᤐᤥᤱᤔᤠᤀᤠᤱ ᤕᤠᤶᤒᤰ ᤆᤥᤰᤔᤠ ᤕᤣᤰᤕᤠ᤺ ᤏᤡᤍᤧᤳᤋᤣᤒᤠ᤺ ᤐᤠ᤺ᤴ ᤐᤠᤋᤢ᤺ ॥
ᤂᤠᤛᤢᤛᤠᤒᤠ᤺ ᤗᤡᤶᤒᤢ᤹ᤖᤣ ᤐᤖᤡᤰ ᤐᤖᤡᤰᤐᤠ᤺ ᤔᤡᤱᤀᤥ ᤂᤠᤶᤒᤥᤱᤘᤠᤜᤠ᤹᤺ ᤀᤠᤛᤣᤴᤍᤣᤀᤠᤱ ᤀᤠᤘᤠ᤺ ॥ ᤁ᤺ᤴ ᤘ᤺ᤣ ᤘ᤺ᤣ ᤐᤥᤱᤔᤠ᤺ᤖᤣ ᤂᤠᤶᤒᤥᤱᤘᤠ ᤕᤢ᤺ᤰ ᤗᤠ᤺ᤄᤥ ᤀ᤺ᤡᤵᤋᤢᤖ ᤋᤣᤖᤢᤀᤠᤱ ᤘᤠ ॥ ᤀᤠᤏᤡᤖᤣᤴ ᤁ᤺ᤴ ᤀᤠ᤺ᤐᤢᤱᤃᤡ ᤀᤡᤗᤡᤶᤔᤡᤴ ᤗᤣᤵᤔᤠᤐᤥᤱ ॥ ᤁᤣᤖᤣᤰᤗᤣᤴ ᤗ᤺ᤌᤡᤰ ᤋᤢᤴᤍᤣᤀᤥ ᤌᤡᤰᤜᤢᤵ ᤐᤥᤱᤔᤠᤀᤠᤱ ᤕᤠᤶᤒᤰ ᤆᤥᤰᤔᤠᤏᤢᤸᤗᤣ ᤘᤣ ᤗᤠ᤺ᤶ ᤜᤥᤵᤐᤠ᤺ ᤁᤢᤒᤠ᤺ᤴ ᤆ᤺ᤧᤰᤂᤢ ॥
ᤈᤡᤸᤗᤠ ᤛᤔᤴᤘᤕ ᤐᤖᤡᤛᤒᤠ᤺ ᤛᤢᤠᤜᤠᤱᤕᤢᤰᤐᤠ᤺ ᤈᤕᤐᤪᤁᤠᤠᤠᤛ ᤖᤠᤀᤡᤖᤧ ᤂᤠᤶᤒᤥᤱᤘᤠᤜᤠ᤹ ᤂᤠᤶᤄᤢᤖᤣ ᤜ᤺ᤡᤏᤠᤶ ᤔᤧᤳᤋᤢᤛᤡᤒᤠ ᤐᤠ᤺ᤴ ᤆ᤺ᤧᤰᤂᤢ ॥
ᤛᤢᤠᤜᤠᤱᤕᤢᤰᤐᤠ᤺ ᤖᤠᤀᤡᤖᤧ ‘ᤀᤠᤏᤡ ᤀᤠᤒᤠᤅᤣ ᤜᤠᤱᤌᤡᤶ ᤗᤠᤶᤗᤥᤒᤠᤜᤠ᤹ᤏᤢ ᤂᤠᤶᤒᤥᤱᤘᤠᤖᤣ ᤐᤠ᤺ᤴᤍᤠᤀᤥ ᤐᤠ᤺ᤴ ᤕᤢᤱᤔᤠ ᤔᤧᤴᤇᤢᤰᤁᤣ ᤀᤠᤘᤠ᤺ ॥ ᤂᤠᤶᤒᤥᤱᤘᤠᤖᤣ ᤐᤠ᤺ᤴᤍᤠᤀᤥᤀᤠᤱ ᤐᤠ᤺ᤴᤌᤱ ᤆᤥᤰᤔᤠ ᤐᤥᤱ ॥ ᤑᤠᤱᤏᤠᤶᤓᤣᤒᤠ᤺ ᤂᤠᤶᤒᤥᤱᤘᤠᤖᤣᤴ ᤗᤠ᤺ᤄᤥ ᤂᤥᤔᤠ ᤌᤡᤰᤜᤢᤵ ᤐᤥᤱᤔᤠᤏᤢᤸᤗᤣ ᤁᤢᤗᤧᤰᤘᤠ ᤗᤠᤶ ᤜᤥᤵ ᤐᤠ᤺ᤋᤢ ॥’
ᤂᤠᤶᤒᤥᤱᤘᤠᤜᤠ᤹ ᤂᤠᤶᤄᤢᤸᤗᤣ ᤀᤥᤃᤠᤵᤗ᤺ᤸ ᤆᤥᤃᤢᤛᤡ ᤛᤢᤠᤜᤠᤱᤕᤢᤰᤐᤠ᤺ ᤖᤠᤀᤡᤖᤧ ᤂᤠᤶᤒᤥᤱᤘᤠ ᤛᤢᤘᤠᤱᤜᤠ ᤏᤢᤒᤠ ᤆᤥᤔᤡᤰ ᤔᤧᤵᤔᤠᤛᤡ ᤐᤥᤱ ॥ ᤕᤠᤱᤏᤡᤶᤓᤢᤱ ᤆᤢᤘᤠᤳ, ᤂᤠᤶᤒᤣᤰ ᤏᤢ ᤋᤠ᤺ᤶᤓᤢᤱᤗᤧᤴ ᤐᤠ᤺ᤴᤃ ᤀᤠᤒᤠᤳᤋᤢᤶ ᤁᤷ ᤋᤠ᤺ᤒᤢᤱ ᤌᤠ᤺ᤒᤥᤴᤏᤠᤱ ᤔᤕᤧᤖ ᤐᤣᤀᤠᤱ ᤘᤠ ॥
ᤈᤏᤈᤠᤋᤡ ᤔᤜᤠᤛᤅ ᤌᤢᤶ ᤕᤰᤆᤢᤶᤖᤣᤴ ᤛᤢᤈᤠᤍᤠᤱᤒᤠ ᤏᤢ ᤜᤣᤰᤕᤠᤶᤛᤠᤒᤠ ᤈᤛᤒᤜᤠᤍᤢᤷ ᤖᤠᤀᤡᤸᤗᤣ ‘ᤂᤠᤶᤒᤥᤱᤘᤠᤜᤠᤖᤣ ᤗᤳᤌᤡᤰ ᤗᤠᤶ ᤗᤠᤱᤄᤣᤰᤔᤠ ᤁᤥᤕᤣᤶᤒᤠ ᤕᤣᤰᤕᤠ᤺ ᤁᤣᤖᤒᤠ ᤆᤧ᤺ᤰᤂᤢ ॥ ᤜᤢ᤺ᤏᤣ ᤀᤠᤏᤡ ᤘ᤺ᤣ ᤘ᤺ᤣᤒᤠ ᤏᤡᤱᤘᤠ᤺ ᤐᤠ᤺ᤴᤀᤥ ᤀᤠᤛᤣᤴᤇᤠᤱ ᤕᤢ᤺ᤰ ᤗᤠ᤺ᤄᤥᤒᤠ ᤋᤢᤴᤍᤣ ᤀᤥ ᤌᤡᤰᤜᤢᤵ ᤐᤥᤱᤔᤠ ᤐᤥᤱ ॥ ᤁᤣᤖᤣᤰᤗᤣᤴ ᤕᤢ᤺ᤰ ᤗᤠ᤺ᤄᤥ ᤏᤢ ᤔᤡᤱᤛᤥᤖᤣ ᤐᤠ᤺ᤴᤍᤠᤀᤥ ᤌᤡᤰᤜᤢᤵ ᤐᤥᤱᤔᤠ ᤀᤠᤱ ᤗᤠᤱᤕᤥᤰ ᤌᤠᤔᤠ ᤐᤥᤱ ॥’
‘ᤀᤠᤒᤠᤅᤣ ᤁᤢᤛᤡᤱ ᤏᤡᤳᤇᤡᤱᤔᤠ ᤐᤥᤱ ॥ ᤂᤠᤶᤒᤥᤱᤘᤠ ᤂᤠᤶᤒᤥᤱᤘᤠ ᤛᤢᤘᤠᤱᤜᤠ᤹ ᤁᤢᤛᤡᤱ ᤏᤡᤳᤇᤡᤱᤔᤠ ᤐᤥᤱ ᤜᤣᤰᤕᤠᤶᤛᤠᤒᤠ ᤈᤛᤒᤜᤠᤍᤢᤷ ᤖᤠᤀᤡᤖᤣ ᤐᤠ᤺ᤴ ᤐᤥᤎᤰᤋᤢ ॥’
ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤌᤥᤛᤢᤍᤡᤶᤔᤠ ᤒᤢᤍ᤻ᤍ ᤔᤠᤕᤠ᤺ ᤛᤥᤱᤔᤡᤖᤣ ᤕᤢ᤺ᤰ ᤗᤠ᤺ᤄᤥ ᤏᤢ ᤔᤡᤱᤛᤥᤖᤣ ᤐᤠ᤺ᤴᤍᤠᤀᤥ ᤜᤠᤱᤌᤡᤶᤔᤡᤸᤗᤧ ᤀᤛᤣᤴᤍᤣᤒᤠ᤺ ᤐᤠ᤺ᤴ ᤕᤢᤰᤂᤢ ॥
ᤌᤥᤛᤢᤍᤡᤶᤔᤠ ᤛᤥᤱᤔᤡᤖᤣ ᤐᤠᤋᤢ᤺ ᤜᤠᤱᤌᤡᤶᤔᤡᤸᤗᤧ ᤀᤛᤣᤴᤍᤣᤀᤠᤱ ᤘᤠ᤺ ॥ ᤌᤡᤰ ᤀᤠᤒᤥᤅᤠᤱ ᤋᤃᤡ ᤐᤥᤔᤠ ᤀᤠᤛᤢᤰᤁᤡᤸᤗᤣ ᤀᤠᤏᤡ ᤜᤠᤱᤌᤡᤶᤔᤡᤸᤗᤧ ᤀᤠᤴᤎᤣᤰᤏᤧᤴ ᤁᤷ ᤆᤶᤏᤡᤱᤘᤠ᤺ ᤘᤠ᤺ᤔᤠ ᤐᤥᤱ ॥
ᤁᤡᤖᤠᤋ᤻ ᤖᤠᤀᤡ ᤕᤠᤕᤥᤰᤂᤠᤒᤠ ᤌᤥᤛᤢᤍᤡᤶᤔᤠ ᤐᤢᤛ᤻ᤐᤠ ᤖᤠᤀᤡᤖᤣ ᤂᤠᤶᤒᤥᤱᤘᤠᤖᤣᤴ ᤕᤢ᤺ᤰ ᤗᤠ᤺ᤄᤥ ᤕᤢᤰ ᤂᤥᤔᤠ᤺ ᤌᤡᤰᤜᤢᤵ ᤁᤣᤖᤣᤰᤏᤢᤸᤗᤣ ᤋ᤺ᤰ ᤕᤧᤰᤕᤠ᤺ ᤘᤠ᤺ᤒᤠ ᤐᤠ᤺ᤴ ᤕᤢᤰᤂᤢ ॥
ᤋᤱᤃᤠᤶᤀᤥ ᤏᤣᤐᤠᤸ ᤔᤃᤷ ᤛᤱᤄ᤹ᤒᤠ ᤀᤡᤛ᤻ᤘᤷ ᤗᤢᤱᤃᤣᤗᤡ ᤔᤃᤷ, ᤋᤔᤢ ᤜ᤻ᤩᤥᤗᤠ᤺ ᤇᤥ᤺ᤈᤎᤡ ᤌᤥᤛᤢᤍᤡᤶᤒᤠ ᤍᤡᤐᤰ ᤃᤢᤖᤢᤱ, ᤋᤠᤔᤠᤱ ᤄᤣᤍᤢᤱ ᤌᤥᤛᤢᤍᤡᤶᤒᤠ ᤋᤡᤁᤠ ᤋᤠᤔᤠᤱ, ᤕᤠᤰᤂᤠ ᤇᤢᤶᤔᤠ᤺ᤖᤣᤴ ᤁᤢᤗᤒᤜᤠᤍᤢᤷ ᤍᤧᤘᤠᤴᤖᤣ ᤂᤠᤶᤒᤥᤱᤘᤠᤜᤠᤖᤣᤴ ᤐᤠ᤺ᤴᤍᤠᤀᤥ ᤜᤠᤱᤌᤡᤶᤏᤢ ᤛᤥᤖᤡᤰ ᤐᤥᤰᤔᤠ ᤁᤣᤒᤥᤱᤒᤠ ᤐᤠ᤺ᤴ ᤔᤣᤕᤢᤰᤂᤢ ॥
ᤏᤣᤐᤠᤰ ᤀᤠᤍᤡᤒᤠᤛᤡ ᤈᤴᤈᤠᤋᤡ ᤔᤜᤠᤛᤱ (ᤑᤥᤏᤡᤈ) ᤌᤥᤛᤢᤍᤡᤶᤒᤠ ᤕᤠᤶ ᤔᤠᤒᤥᤜᤠᤱ ᤗᤡᤶᤒᤢ ᤏᤢ ᤏᤣᤐᤠᤰ ᤐᤋᤪᤁᤠᤷ ᤔ᤺ᤜᤠᤛᤱ ᤑᤠ᤺ ᤌᤥᤛᤢᤍᤡᤶᤔᤠ ᤛᤢᤏᤡᤋᤠ᤺ ᤂᤠᤗᤡᤱᤜᤠ᤺ᤖᤣ ᤂᤠᤶᤒᤥᤱᤘᤠ ᤕᤢᤰᤗᤠ᤺ᤄᤥᤴ ᤁᤢᤃᤥ ᤁᤢᤓᤠᤱ ᤁᤣᤖᤣᤰ ᤕᤢᤰᤑᤥᤍᤠᤱᤒᤠᤜᤠ᤺ᤖᤣ ᤆᤥᤰᤔᤠ᤺ ᤁᤣᤒᤥᤱᤒᤠ᤺ ᤐᤠ᤺ᤴ ᤕᤢᤰᤂᤣᤛᤢᤖ ᤕᤠᤶᤒᤰ ᤆᤥᤰ ᤁᤣᤛᤢᤰᤐᤠ ᤐᤥᤱᤔᤠ ᤕᤧᤰᤕᤠ᤺ ᤘᤠ᤺ᤒᤠ ᤐᤠ᤺ᤴ ᤆᤰᤋᤣᤛᤢ ॥
ᤈᤏᤈᤠᤋᤡ ᤔᤜᤠᤛᤅ ᤌᤢᤶ ᤕᤰᤆᤢᤶᤖᤣᤴ ᤌᤥᤛᤢᤍᤡᤶᤒᤠ᤺ ᤀᤓᤡᤛᤣᤰ ᤕᤧᤰᤋᤣᤴᤖᤣ ᤁᤈᤢᤶᤗᤢᤱᤍᤠᤱᤒᤠ᤺ᤀᤥ ᤁᤣᤒᤥᤱᤒᤠ ᤋᤱᤃᤠᤶᤀᤥ ᤑᤥ᤺ᤌᤥᤛᤢᤍᤡᤶᤒᤠ ᤓᤰᤋ ᤌᤠᤔᤡᤖᤣ ᤗᤠ᤺ᤶᤍᤰ ᤆᤥᤃᤢᤷ ᤒᤡᤛ᤻ᤘ ᤀᤠᤍᤡᤒᤠᤛᤡ ᤍᤡᤘᤛᤖᤣᤴ ᤐᤠ᤺ᤴᤍᤠᤀᤥ ᤌᤠᤀᤡᤱ ᤆᤥᤃᤢᤀᤠᤱ ᤘᤕᤣ ॥ ᤋᤱᤃᤠᤶᤔᤡᤴ ᤛᤢᤜᤠᤱᤔᤡᤔᤠ᤺ ᤖᤴᤈᤡᤋᤠ ᤈᤡᤔᤡ ᤕᤠᤰᤂᤠᤖᤣ ᤀᤡᤈᤠᤰ ᤆᤥᤃᤢ᤺ ॥
